സുൽത്താൻ ബത്തേരിയിൽ ഇന്ന് ബിജെപി ഹര്‍ത്താൽ

സുൽത്താൻ ബത്തേരി: വയനാട് സുൽത്താൻ ബത്തേരി താലൂക്കിൽ ഇന്ന് ബിജെപി ഹർത്താൽ. വന്യമൃഗശല്യം സംബന്ധിച്ച് നിരവധിത്തവണ പരാതി സമര്‍പ്പിച്ചിട്ടും ശാശ്വത പരിഹാരം കാണാൻ സാധിക്കാത്ത അധികൃതരുടെ അനാസ്ഥ നിറഞ്ഞ നടപടിയിൽ പ്രതിഷേധിച്ചാണ് ഹര്‍ത്താല്‍. രാവിലെ 6 മുതൽ വൈകുന്നേരം 6 വരെയാണ് ഹർത്താൽ ആചരിക്കുക. അവശ്യ സര്‍വ്വീസുകളെ ഹര്‍ത്താലിൽ നിന്ന് ഒഴിവാക്കിയിട്ടുണ്ട്. വയനാട് സുല്‍ത്താന്‍ ബത്തേരി ചീരാലില്‍ ഭീതി പരത്തിയ കടുവയെ ഇനിയും അധികൃതര്‍ക്ക് പിടികൂടാനായിട്ടില്ല. കടുവ ചീരാല്‍ പ്രദേശത്ത് രണ്ടുമാസമായി വിലസുകയാണെന്ന് നാട്ടുകാര്‍ വ്യക്തമാക്കി.



ചീരാലില്‍ കടുവ കഴിഞ്ഞ ദിവസം രണ്ട് പശുക്കളെയാണ് ആക്രമിച്ചു കൊന്നത്. തുടര്‍ന്ന് പശുവിന്‍റെ ജഡവുമായി നാട്ടുകാര്‍ റോഡ് ഉപരോധിച്ചു. മതിയായ നഷ്ടപരിഹാരം നല്‍കാമെന്നും കടുവയെ പിടികൂടാന്‍ കൂടുകള്‍ സ്ഥാപിക്കാമെന്നുമുള്ള ഉറപ്പിനെ തുടര്‍ന്നാണ് ഉപരോധം നിര്‍ത്തിയത്. വനംവന്യജീവി വകുപ്പിന്‍റെ നേതൃത്വത്തില്‍ പ്രദേശത്ത് വ്യപകമായ തെരച്ചില്‍ നടത്തവേ കടുവയെ പലതവണ കണ്ടെങ്കിലും പിടിക്കാൻ സാധിച്ചില്ല. കഴിഞ്ഞ രണ്ടുമാസത്തിനിടെ കടുവയുടെ ആക്രമണത്തില്‍ ഈ മേഖലയില്‍ നിരവധി വളര്‍ത്തുമൃഗങ്ങളാണ് കൊല്ലപ്പെട്ടതെന്നും നാട്ടുകാര്‍ സാക്ഷ്യപ്പെടുത്തുന്നു. കടുവയെ കാട്ടിലേക്ക് തിരിച്ചയക്കാനുള്ള നടപടികള്‍ വനംവകുപ്പ് ഇന്നും തുടരും.

BJP Harthal at Sulthan Batheri

Tiger at living Place: BJP Harthal at Sulthan Batheri taluk, Wayanadu