ബിജെപിയുടെ ശ്രമം ക്രമസമാധാനം തകർക്കാനെന്ന് കടകംപള്ളി

ചെങ്ങന്നൂര്‍: ബിജെപി കുറച്ചുനാളായി നടത്തുന്നത് സംസ്ഥാനത്തെ ക്രമസമാധാനം തകര്‍ക്കാനുള്ള ശ്രമമാണെന്നും ജനങ്ങള്‍ക്ക് കാര്യങ്ങള്‍ മനസ്സിലാകുന്നുണ്ടെന്നും ദേവസ്വം മന്ത്രി കടകംപള്ളി സുരേന്ദ്രൻ. യാതൊരു ആവശ്യങ്ങളുമില്ലാതെ ബിജെപി പ്രതിഷേധം സംഘടിപ്പിക്കുകയാണെന്നും കടകംപള്ളി ആരോപിച്ചു.

ബിജെപി ഇന്ന് നടത്തുന്ന പ്രതിഷേധത്തിന് അടിസ്ഥാനമില്ലെന്നും അവര്‍ ചെന്നുപെട്ട വൈതരണിയിൽ കിടന്ന് കൈകാലിട്ടടിക്കുകയാണെന്നും കടകംപള്ളി പറഞ്ഞു. ശബരിമലയിലെ പ്രശ്നങ്ങളെല്ലാം പരിഹരിച്ചു കഴിഞ്ഞതാണെന്നും ബിജെപി കേന്ദ്രനേതൃത്വം പറയുന്നത് നിര്‍വാഹമില്ലാതെ സംസ്ഥാനനേതൃത്വം അനുസരിക്കുകയാണെന്നും മന്ത്രി പരിഹസിച്ചു.

കെ സുരേന്ദ്രന്‍റെ അറസ്റ്റിൽ പ്രതിഷേധിച്ച് ബിജെപി മുഖ്യമന്ത്രിയെ വഴിയിൽ തടയാൻ ശ്രമിക്കുകയാണെന്ന് മന്ത്രി പറഞ്ഞു. കെ സുരേന്ദ്രൻ വിചാരിക്കുന്നത് സുരേന്ദ്രനെ അറസ്റ്റ് ചെയ്യില്ലെന്നാണോയെന്ന് മന്ത്രി ചോദിച്ചു. ഒരു വഴിതടയല്‍ സമരത്തിനു പോയാല്‍ പോലും കേസുണ്ടാകുമെന്നും അത് മനസ്സിലാക്കാനുള്ള ബുദ്ധി സുരേന്ദനോ ബിജെപിയ്ക്കോ ഇല്ലെന്ന് താൻ കരുതുന്നില്ലെന്നും കടകംപള്ളി പറഞ്ഞു.

ഇതിനിടെ ചെങ്ങന്നൂരിൽ മുഖ്യമന്ത്രി പങ്കെടുക്കുന്ന പരിപാടിയില്‍ പ്രതിഷേധം നടത്തിയ ബിജെപി പ്രവര്‍ത്തകരെ പോലീസ് തടഞ്ഞു. മുഖ്യമന്ത്രി സംസാരിക്കാൻ തുടങ്ങുന്നതിനിടെ വേദിയ്ക്ക് പുറത്തായി ശരണം വിളിച്ച് പ്രതിഷേധിച്ച സ്ത്രീകളെ ശ്രദ്ധിക്കാതെ മുഖ്യമന്ത്രി സംസാരം തുടര്‍ന്നു.