നിരാഹാരം: എഎന്‍ രാധാകൃഷ്ണനെ ആശുപത്രിയിലേക്ക് മാറ്റി

തിരുവനന്തപുരം: ശബരിമല വിഷയവുമായി ബന്ധപ്പെട്ട് നിരാഹാരസമരം നടത്തി വന്നിരുന്ന ബിജെപി സംസ്ഥാന ജനറൽ സെക്രട്ടറി എ.എൻ.രാധാകൃഷ്ണനെ ആശുപത്രിയിലേക്ക് മാറ്റി. എട്ട് ദിവസത്തെ നിരാഹാരസമരത്തിന് പിന്നാലെ ആരോഗ്യനില വഷളായതിനെ തുടര്‍ന്നാണ് നടപടി. ഡോക്ടര്‍മാരുടെ നിര്‍ദ്ദേശത്തെത്തുടര്‍ന്നാണ് പോലീസ് രാധാകൃഷ്ണനെ അറസ്റ്റ് ചെയ്ത് ആശുപത്രിയിലേക്ക് മാറ്റിയത്.

ആരോഗ്യനില മോശമാണെന്നും രക്തത്തിലെ പഞ്ചസാരയുടെ അഴവ് ക്രമാതീതമായി കുറഞ്ഞിട്ടുണ്ടെന്നും ഡോക്ടര്‍മാര്‍ വ്യക്തമാക്കി. ഉടന്‍ ആശുപത്രിയിലേക്ക് മാറ്റണമെന്നും ഡോക്ടര്‍മാര്‍ നിര്‍ദ്ദേശിച്ചു. ഇതിന് പിന്നാലെയാണ് രാധാകൃഷ്ണനെ ആശുപത്രിയിലേക്ക് മാറ്റിയത്. അതേസമയം ആശുപത്രിയിലും നിരാഹാരം തുടരുമെന്ന് രാധാകൃഷ്ണന്‍ വ്യക്തമാക്കി.

നിരാഹാരം എട്ടാം ദിവസത്തിലേക്ക് കടന്ന ഇന്ന് ബിജെപി സംസ്ഥാന വ്യാപകമായി പ്രതിഷേധദിനം ആചരിച്ചിരുന്നു. പ്രതിഷേധ ദിനാചരണത്തിന്‍റെ ഭാഗമായി തിരുവനന്തപുരത്ത് പാര്‍ട്ടി പ്രവര്‍ത്തകര്‍ സെക്രട്ടേറിയറ്റ് മാര്‍ച്ചും ഇതര ജില്ലകളില്‍ കളക്‌ട്രേറ്റ് മാര്‍ച്ചുകളും സംഘടിപ്പിച്ചിരുന്നു. വൈകിട്ട് എല്ലാ പഞ്ചായത്തുകളിലും ബിജെപി പ്രതിഷേധപ്രകടനങ്ങളും നടത്തിയിരുന്നു.