നേതൃത്വത്തിന് ഗുണകരം; മുസ്ലിം ലീഗിനെ എൻഡിഎയിലേക്ക് സ്വാഗതം ചെയ്ത് ശോഭാ സുരേന്ദ്രൻ

താൻ ഏഴ് തെരഞ്ഞെടുപ്പുകളിൽ മത്സരിച്ചിട്ടുണ്ട്. എന്നാൽ ഇക്കുറി മത്സരിക്കുന്നില്ലെന്ന് കേന്ദ്ര നേതൃത്വത്തെ നേരത്തേ തന്നെ അറിയിച്ചിട്ടുണ്ട്. അയ്യായിരം വോട്ടുകൾ മാത്രം ലഭിച്ചിരുന്ന സമയത്തും മത്സരത്തിന് ഇറങ്ങിയിട്ടുണ്ട്. ഇപ്പോൾ വിജയ പ്രതീക്ഷയുള്ള സമയത്ത് ത്യാഗം ചെയ്യാൻ കഴിയുമെന്നാണ് ഇതിലൂടെ വ്യക്തമാക്കുന്നത്- ശോഭ പറയുന്നു.

കൊവിഡ്കാലത്ത് 36 കോളനികളിൽ സഹായം എത്തിക്കാൻ കഴിഞ്ഞിട്ടുണ്ട്. എന്നാൽ ഇതിന് മാധ്യമങ്ങളിലൂടെ പ്രാചാരണം നൽകിയില്ല. എട്ടര മാസം മാറി നിന്നെങ്കിലും പാർട്ടിയുടെ ആഭ്യന്തര പ്രശ്നം ആയതിനാൽ പൊതു ചർച്ചയ്ക്ക് വിധേയമാക്കുന്നില്ല. 33 വർഷം പ്രവർത്തിച്ചിടത്തു നിന്നാണല്ലോ എട്ടര മാസം മാറി നിന്നത്. ഈ സമയത്ത് മൂന്ന് പുസ്തകങ്ങൾ എഴുതി. അവ ഉടൻ പുറത്തിറങ്ങും. ബിജെപിയിൽ നിന്നും പുറത്തു പോകുമെന്ന വാർത്ത ഗൂഢാലോചനയുടെ ഭാഗമാണെന്നും ശോഭാ സുരേന്ദ്രൻ പറഞ്ഞു.

മുസ്ലിം ലീഗ് എൻഡിഎയിൽ ചേരാൻ തയ്യാറായാൽ സ്വീകരിക്കും. ക്രൈസ്തവ, മുസ്ലിം സമുദായങ്ങളോട് ബിജെപിക്ക് വിരോധമില്ല. മാതൃഭൂമി പത്രത്തിന് നൽകിയ അഭിമുഖത്തിലാണ് അവർ അഭിപ്രായം വ്യക്തമാക്കിയത്.

മുസ്ലിം ലീഗ് വർഗീയ പാർട്ടിയാണെന്നതിൽ തർക്കമില്ലെന്നും എന്നാൽ അവർ ദേശീയ ധാര ഉപേക്ഷിച്ച് എൻഡിഎക്കൊപ്പം വരാൻ തയ്യാറായാൽ സ്വീകരിക്കുമെന്നും ശോഭാ സുരേന്ദ്രൻ പറഞ്ഞു.

കാശ്മീരിൽ അവിടുത്തെ നാഷ്ണൽ കോൺഫ്രൻസുമായി ബിജെപി സഖ്യമുണ്ടാക്കിയിട്ടുണ്ട്. ലീഗ് പുനർ വിചിന്തനത്തിന് തയ്യാറായാൽ അത് മുസ്ലിം സമൂഹത്തിനും ലീഗ് നേതൃത്വത്തിനും ഗുണകരമായിരിക്കുമെന്ന് ശോഭ കൂട്ടിച്ചേർത്തു.