ന്യൂനപക്ഷത്തെ കൂട്ടുപിടിക്കാതെ ഒരു രക്ഷയുമില്ല
തെരഞ്ഞെടുപ്പുകളില്‍ ന്യൂനപക്ഷത്തെ കൂട്ടുപിടിക്കാതെ ഒരു വിജയവും നേടാനാവില്ലെന്ന് ബിജെപി തിരിച്ചറിഞ്ഞു. ന്യൂനപക്ഷ വോട്ടുകളുടെ ഏകീകരണവും വോട്ട് വിഭജനവും പാര്‍ട്ടിയിലെ വിഭാഗീയതയുമാണ് ബിജെപിയ്ക്ക് തെരഞ്ഞെടുപ്പിലേറ്റ തിരിച്ചടിയ്ക്ക് കാരണമായതെന്നാണ് വിവിധ തെരഞ്ഞെടുപ്പ് അവലോകന യോഗങ്ങളില്‍ പാര്‍ട്ടി വിലയിരുത്തിയത്.
കുടുംബശ്രീ പ്രചോദനം
സിപിഎം സ്വാധീനം നല്‍കിയ കുടുംബശ്രീ യൂണിറ്റുകള്‍ പോലുള്ളവ കെട്ടിപ്പടുക്കുവാന്‍ ബിജെപിയ്ക്ക് പ്രചോദനമായി. ബിജെപി തന്നെ മുന്നോട്ടുവച്ച അക്ഷയശ്രീയിലൂടെയാണ് ഇനി ന്യൂനപക്ഷങ്ങളെ ലക്ഷ്യം വയ്ക്കുന്നത്. 1998 മേയ് 17 ന് മുന്‍ പ്രധാനമന്ത്രി അടല്‍ ബിഹാരി വാജ്‌പേയിയാണ് കുടുംബശ്രീ ഉദ്ഘാടനം ചെയ്തത്. പില്‍ക്കാലത്ത് കുടുംബശ്രീ സിപിഎമ്മിന്റെ ശക്തമായ പ്രവര്‍ത്തന കേന്ദ്രമായി മാറുകയായിരുന്നു.
എന്താണ് അക്ഷയശ്രീ?
ബിജെപിയുടെ ഏറ്റവും വലിയ സഹകരണ ശൃംഖലയായ സഹകാര്‍ ഭാരതിയുടെ ഭാഗമാണ് അക്ഷയശ്രീ. 1978 ല്‍ ആര്‍എസ്എസ് പ്രവര്‍ത്തകരായ ലക്ഷ്മണറാവു ഇനാംദറും മാധവ് റാവു ഗോഡ്‌ബോലെയും ചേര്‍ന്നാണ് സഹകാര്‍ ഭാരതി ആരംഭിച്ചത്. കേരളത്തില്‍ സഹകാര്‍ ഭാരതിക്ക് ആറ് യൂണിറ്റുകളാണ് ഉള്ളത്. മഹിളാ സെല്ലുകള്‍, സ്വയം സഹായ സംഘങ്ങള്‍ (എസ്.എച്ച്.ജി), ഡയറി, ക്ഷീര കര്‍ഷക സെല്‍, ക്രെഡിറ്റ് സെല്‍, മത്സ്യത്തൊഴിലാളി സെല്‍, തൊഴിലാളി സെല്‍ എന്നിവയാണ് ഉള്ളത്. അക്ഷയശ്രീ, ഗ്രാമീണ സമൃദ്ധി സ്‌റ്റോറുകള്‍ എന്നിവ സ്വയം സഹായ സംഘങ്ങളുടെ കീഴിലാണ് വരുന്നവയാണ്. സംസ്ഥാനത്ത് നിലവില്‍ 7800 അക്ഷയശ്രീ യൂണിറ്റുകള്‍ സജീവമായി പ്രവര്‍ത്തിക്കുന്നുണ്ട്. 2024 ഓടെ 25,000 യൂണിറ്റുകള്‍ പ്രവര്‍ത്തന സജ്ജമാക്കാനാണ് അക്ഷയശ്രീ മിഷന്‍ ലക്ഷ്യമിടുന്നതെന്ന് മാതൃഭൂമി ന്യൂസ് റിപ്പോര്‍ട്ട് ചെയ്യുന്നു.