സിപിഎം കത്തോലിക്കാ സഭയെ വേട്ടയാടുന്നുവെന്ന് ബിജെപി

കോഴിക്കോട്: കത്തോലിക്കാ സഭയെ ബിഷപ്പ് ഫ്രാങ്കോ മുളക്കലിന് എതിരായ കേസിൽ വേട്ടയാടുന്നുവെന്ന് ബിജെപി നേതാവ് അഡ്വ. ബി.ഗോപാലകൃഷ്ണൻ. ബിഷപ്പിനെ അറസ്റ്റ് ചെയ്യാൻ വൈകുന്നതിലൂടെ കത്തോലിക്കാ സഭയെ സിപിഎം വേട്ടയാടുകയാണെന്ന് ഗോപാലകൃഷ്ണൻ ആരോപിച്ചു. സഭ ഒരിക്കലും സർക്കാരിന്റെ കെണിയിൽ വീഴരുതെന്നും ഗോപാലകൃഷ്‌ണൻ വ്യക്തമാക്കി.

പ്രതിരോധം സൃഷ്ടിക്കാൻ വേണ്ടിയാണ് കേരള പോലീസ് ബിഷപ്പിന് നോട്ടീസ് അയച്ചത്. തൃശൂർ നിന്നുള്ള ഇടനിലക്കാരൻ വഴി സർക്കാർ സാമ്പത്തിക നേട്ടം ഉണ്ടാക്കിയതായി സംശയമുണ്ടെന്നും ഗോപാലകൃഷ്ണൻ ആരോപിച്ചു.ഐഎസ്ആർഒ ചാരക്കേസ് വിധിയുടെ പശ്ചാത്തലത്തിലും ഗോപാലകൃഷ്ണൻ ആരോപണമുന്നയിച്ചു.എ.കെ.ആന്റണിയുടെ അധികാരത്തോടുള്ള ആർത്തി രാജ്യത്തിൻറെ ശാസ്ത്ര മുന്നേറ്റത്തെ തടഞ്ഞുവെന്ന് ഗോപാലകൃഷ്ണൻ ആരോപിച്ചു.

നമ്പി നാരായണന്റെ ഹർജി അംഗീകരിച്ച് സുപ്രീം കോടതി ഉത്തരവിട്ട ജസ്റ്റിസ് ഡി.കെ.ജയിന്റെ അന്വേഷണ പരിധിയിൽ ഉമ്മൻ ചാണ്ടിയെയും എ.കെ. ആന്റണിയെയും കൊണ്ട് വരണമെന്ന് അഡ്വ.ഗോപാലകൃഷ്‍ണൻ ആവശ്യപ്പെട്ടു. ആരൊക്കെയാണ് കരുണാകരനെ ചതിച്ചതെന്ന് കെ.മുരളീധരൻ ഇനിയെങ്കിലും വ്യക്തമാക്കണമെന്നും അദ്ദേഹം പറഞ്ഞു.