ചാണ്ടി ഉമ്മൻ പറഞ്ഞത് എന്ത് അടിസ്ഥാനത്തിൽ; ഹാഗിയ സോഫിയ പള്ളി തകർക്കുന്നവർ കേരളത്തിൽ മത തീവ്രവാദം വളർത്തുന്നു: കെ സുരേന്ദ്രൻ

ഹാഗിയ സോഫിയ പള്ളി തകർത്തവർ തന്നെയാണ് കേരളത്തിൽ മത തീവ്രവാദം വളർത്തുന്നതെന്ന് ബിജെപി സംസ്ഥാന അധ്യക്ഷൻ കെ സുരേന്ദ്രൻ പറഞ്ഞു. ലോകത്താകമാനം ക്രിസ്ത്യൻ പള്ളികൾ തകർക്കുന്നത് മുസ്ലിം ഭീകരരാണെന്നും അവരും ജമാഅത്തെ ഇസ്ലാമിയും പോപ്പുലർ ഫ്രണ്ടും ഒന്നുതന്നെയാണെന്നും സുരേന്ദ്രൻ പറഞ്ഞു. ഉമ്മൻ ചാണ്ടിയുടെ മകൻ പറഞ്ഞത് ക്രിസ്ത്യൻ പള്ളികൾ തകർക്കുന്നത് ബാർ ഉടമകളാണെന്നാണ്, ഇതെന്ത് ന്യായമാണെന്നും സുരേന്ദ്രൻ ചോദിച്ചു.

ലോകത്തെമ്പാടും ക്രിസ്ത്യൻ പള്ളികൾ തകർക്കുന്നത് മുസ്ലിം ഭീകരരാണ്. എന്താണ് നിങ്ങളുടെ നിലപാട്. കോൺഗ്രസ് യാഥാർത്ഥ്യങ്ങളുമായി പൊരുത്തപ്പെടണം. മുസ്ലിം ലീഗിന്റെ സമ്മർദ്ദത്തിന് വഴങ്ങി കോൺഗ്രസ് വർഗീയ ശക്തികളുടെ തടവറയിലാണ് നിൽക്കുന്നത്. അത് കേരളത്തിന് ഗുണകരമല്ലെന്നും കേരളം അപകടകരമായ അവസ്ഥയിലേക്കാണ് പോകുന്നതെന്നും കെ സുരേന്ദ്രൻ പറഞ്ഞു.

ഉമ്മൻ ചാണ്ടി ശബരിമലയുടെ കാര്യത്തിൽ കുറ്റകരമായ മൗനമാണ് പാലിച്ചത്. വിഷയത്തിൽ സമരത്തിന് പോയവരെ ഉമ്മൻ ചാണ്ടി കോൺഗ്രസിൽ നിന്നും പുറത്താക്കി. സമരത്തിനു പോയവരെ കലാപകാരികളെന്നാണ് അദ്ദേഹം വിശേഷിപ്പിച്ചത്. മുസ്ലിം തീവ്രവാദം കേരളത്തിൽ ശക്തമായി വളരുകയാണെന്നും സുരേന്ദ്രൻ ആരോപിച്ചു. ക്രിസ്ത്യൻ പെൺകുട്ടികളെ പ്രണയം നടിച്ച് സിറിയയിലേക്ക് അയക്കുകയാണ്. ക്രിസ്ത്യൻ-ഹിന്ദു പെൺകുട്ടികളെ മതം മാറ്റുകയാണ്. ഇതിൽ ഉമ്മൻ ചാണ്ടിയുടെ നിലപാടെന്താണ്. നൂറ് പെൺകുട്ടികളെ ലൗ ജിഹാദ് നടത്തി സിറിയയിലേക്ക് അയക്കാൻ നോക്കിയെന്നും സുരേന്ദ്രൻ ആരോപിച്ചു.