ബിജെപി സമരം കടുപ്പിക്കുന്നു; ഉത്തരേന്ത്യൻ സന്ന്യാസിമാരെ രംഗത്തിറക്കും

തൃശ്ശൂര്‍: ശബരിമല യുവതിപ്രവേശനവിധിയ്ക്കെതിരെ സമരം കടുപ്പിക്കാനൊരുങ്ങി സംഘപരിവാര്‍.ഉത്തരേന്ത്യയിൽ നിന്നുള്ള സന്ന്യാസിമാരെ സമരമുഖത്തേയ്ക്ക് എത്തിക്കാനാണ് ബിജെപി അധ്യക്ഷൻ അമിത് ഷായുടെ നിര്‍ദേശം.

ബിജെപി സംസ്ഥാന അധ്യക്ഷൻ പി എസ് ശ്രീധരൻ പിള്ള ചൊവ്വാഴ്ച നടത്തിയ പത്രസമ്മേളനത്തിലാണ് പുതിയ സമരരീതിയെക്കുറിച്ച് സൂചിപ്പിച്ചത്. രാമജന്മഭൂമി പ്രശ്നത്തിൽ ബിജെപി നടത്തിയ സമരരീതി കേരളത്തിലും പരീക്ഷിക്കാനാണ് ശ്രമം. ശബരിമലയുടെ അടുത്തുള്ള ഏതെങ്കിലും പ്രദേശത്ത് വലിയ സന്ന്യാസിസമ്മേളനം നടത്താനും ബിജെപി പദ്ധതിയിടുന്നതായി റിപ്പോര്‍ട്ടുണ്ട്.

ക്ഷേത്രഭരണം സര്‍ക്കാര്‍ നിയന്ത്രണത്തിൽ നിന്ന് മോചിപ്പിക്കുന്നത് ഉള്‍പ്പെടെയുള്ള കാര്യങ്ങള്‍ ഈ സമരത്തിലൂടെ മുന്നോട്ടുവെയ്ക്കാനാണ് ബിജെപിയുടെ നീക്കം. ഇതുവഴി സമരം ദേശീയശ്രദ്ധയിലേയ്ക്ക് കൊണ്ടുവരാൻ സാധിക്കുമെന്നും ബിജെപി പ്രതീക്ഷിക്കുന്നു.

ആചാരവിരുദ്ധമായി ദര്‍ശനത്തിനെത്തുന്ന സ്ത്രീകളെ ബിജെപി പിന്തിരിപ്പിക്കുമെന്നും ഇതിനായി പാര്‍ട്ടിയുടെ നാല് ജനറൽ സെക്രട്ടറിമാരെ പമ്പയിലും സന്നിധാനത്തും ചുമതലപ്പെടുത്തിയിട്ടുണ്ടെന്നും ശ്രീധരൻ പിള്ള പറഞ്ഞു. ശബരിമലയിൽ ബിജെപിയ്ക്ക് സംഘര്‍ഷത്തിന് താത്പര്യമില്ലെന്നും അദ്ദേഹം കൂട്ടിച്ചേര്‍ത്തു.