നിയമസഭാ തിരഞ്ഞെടുപ്പ്: 11 മണ്ഡലങ്ങളിൽ ശ്രദ്ധയര്‍പ്പിക്കാൻ ബിജെപി

തിരുവനന്തപുരം: നിയമസഭാ തിരഞ്ഞെടുപ്പ് മുന്നിൽകണ്ട് 11 മണ്ഡലങ്ങളിൽ ശ്രദ്ധയര്‍പ്പിക്കാൻ ബിജെപി. ഈ മണ്ഡലങ്ങളിലെ പ്രവര്‍ത്തനങ്ങള്‍ ഏകോപിപ്പിക്കാൻ രണ്ടു കേന്ദ്രനേതാക്കളെ ബിജെപി നേതൃത്വം നിയോഗിച്ചിട്ടുണ്ട്. കേന്ദ്ര പെട്രോളിയം മന്ത്രി ധര്‍മേന്ദ്ര പ്രധാനും കര്‍ണാടകയിൽ നിന്നുള്ള ബിജെപി എംപി നളിൻകുമാര്‍ കട്ടീലിനുമാണ് ചുമതല.

ഇരുനേതാക്കളും കേരളത്തിലെത്തി മണ്ഡലങ്ങളിലെ രാഷ്ട്രീയസാഹചര്യം സംബന്ധിച്ച പ്രാഥമിക റിപ്പോര്‍ട്ട് തയ്യാറാക്കി. സംസ്ഥാന നേതൃത്വത്തിൻ്റെ റിപ്പോർട്ടുകളുടെയും വിവിധ ഏജൻസികളി‍ൽ നിന്നുള്ള വിവരങ്ങളുടെയും അടിസ്ഥാനത്തിൽ കേന്ദ്രനേതൃത്വമാണ് 11 മണ്ഡലങ്ങൾ തിരഞ്ഞെടുത്തത്. കഴിഞ്ഞ നിയമസഭാ തിരഞ്ഞെടുപ്പിൽ ലഭിച്ച വോട്ടുകളും മണ്ഡലങ്ങളിലെ സംഘടനാബലവും മാനദണ്ഡമാക്കിയാണ് മണ്ഡലങ്ങളുടെ പട്ടിക തയ്യാറാക്കിയിട്ടുള്ളത്.

തിരുവനന്തപുരം, ആറ്റിങ്ങൽ, കൊല്ലം, മാവേലിക്കര, ആലപ്പുഴ, പത്തനംതിട്ട, ചാലക്കുടി, തൃശൂർ, പാലക്കാട്, കോഴിക്കോട്, കാസർകോട് എന്നീ മണ്ഡലങ്ങലാണ് ബിജെപി ശ്രദ്ധയർപ്പിക്കുന്നത്.