കീഴാറ്റൂരിൽ നന്ദിഗ്രാമിൽ നിന്ന് ആളെയിറക്കാൻ ബിജെപി

കണ്ണൂര്‍: തളിപ്പറമ്പിനു സമീപം കീഴീറ്റൂരിൽ വയൽ നികത്തി ദേശീയപാത നിര്‍മിക്കുന്നതിനെതിരെ നടക്കുന്ന പൊതുജനസമരത്തിലേയ്ക്ക് നന്ദിഗ്രാമിൽ നിന്ന് കര്‍ഷകരെയെത്തിക്കാൻ ബിജെപി. ഏപ്രിൽ മൂന്നിന് കീഴാറ്റൂരിൽ നിന്ന് കണ്ണൂരിലേയ്ക്ക് ബിജെപിയുടെ നേതൃത്വത്തിൽ നടത്തുന്ന കര്‍ഷകമാര്‍ച്ചിന്‍റെ ഭാഗമായി നന്ദിഗ്രാമിൽ നിന്ന് കര്‍ഷകരെയെത്തിക്കുമെന്ന് ബിജെപി നേതാവ് പി ഗോപാലക‍ൃഷ്ണൻ അറിയിച്ചു.

മൂന്നിനു രാവിലെ കീഴാറ്റൂരിൽ നിന്ന് സംസ്ഥാന അധ്യക്ഷൻ കുമ്മനം രാജശേഖരൻ ഉദ്ഘാടനം ചെയ്യുന്ന മാര്‍ച്ച് പി കെ കൃഷ്ണദാസ് നയിക്കും.

കോൺഗ്രസും ബിജെപിയും ഉള്‍പ്പെടുന്ന പ്രതിപക്ഷപാര്‍ട്ടികളുടെയും മറ്റു ബഹുജനസംഘടനകളുടെയും നേതൃത്വത്തിൽ കീഴാറ്റൂര്‍ സമരത്തിന് അഭിവാദ്യമര്‍പ്പിച്ച് ഇന്ന് നടത്തിയ 'കേരളം കീഴാറ്റൂരിലേയ്ക്ക്' മാര്‍ച്ചിന് വൻപങ്കാളിത്തമാണ് ലഭിച്ചത്. സുരേഷ് ഗോപി എം പി ഉള്‍പ്പെടെയുള്ള ബിജെപി എംപിമാരും സ്ഥലത്ത് സന്നിഹിതരായിരുന്നു.