Kerala BJP: ബിജെപി നിലക്കലിൽ ഇന്ന് നിരോധനാജ്ഞ ലംഘിക്കും

നിലക്കൽ: ബിജെപി സംസ്ഥാനനേതൃത്വത്തിനെതിരെ ദേശീയ നേതൃത്വം വിമർശനമുയർതിയതിനെ തുടർന്ന് സമരം ശക്തമാക്കുന്നു. ഇന്ന് നിലക്കലിൽ ബിജെപി നിരോധനാജ്ഞ ലംഘിക്കും. ബിജെപി ദേശീയ നേതൃത്വം സംസ്ഥാന നേതൃത്വത്തിനെതിരെ കടുത്ത വിമർശനമാണ് ഉന്നയിച്ചത്. ശബരിമല സമരം മുന്നോട്ട് കൊണ്ട് പോകുന്നതു സംബന്ധിച്ച് സംസ്ഥാന നേതാക്കൾക്കിടയിലും ഭിന്നത രൂക്ഷമാകുന്നുണ്ട്.

സമരം ശക്തമാക്കുന്നതിന്റെ ഭാഗമായി ഇന്ന് ബിജെപി പ്രവർത്തകർ ചെങ്ങന്നൂരിൽ മുഖ്യമന്ത്രിയെയും മറ്റ് മന്ത്രിമാരെയും തടയും. സഹകരണ വകുപ്പ് പ്രളയം ബാധിച്ചവർക്ക് വീട് നിർമിക്കാൻ പണം നൽകുന്ന പദ്ധതിയുടെ ഉദ്‌ഘാടനം നിർവഹിക്കാനാണ് മുഖ്യമന്ത്രി ഇന്ന് ചെങ്ങന്നൂരിൽ എത്തുന്നത്. കെ.സുരേന്ദ്രനെതിരെയുള്ള പോലീസ് നടപടിയിലും ബിജെപി ഇന്ന് പ്രതിഷേധിക്കും. സുരേന്ദ്രനെ മുഖ്യമന്ത്രിയുടെ ഓഫീസ് നേരിട്ട് ഇടപെട്ട് കള്ളക്കേസുകളിൽ കുടുക്കുകയാണെന്ന് ബിജെപി നേതൃത്വം ആരോപിച്ചു. അതിനിടെ, കനത്ത സുരക്ഷയാണ് ശബരിമലയിലും നിലക്കലും ഒരുക്കിയിട്ടുണ്ട്.