പുഴയിൽ ചാടി ജീവനൊടുക്കിയ അര്‍ജന്‍റീന ആരാധകന്‍റെ മൃതദേഹം കിട്ടി

കോട്ടയം: ലോകകപ്പ് മത്സരത്തിൽ അര്‍ജന്‍റീനയുടെ തോൽവിയിൽ മനം നൊന്ത് ആത്മഹത്യാക്കുറിപ്പ് എഴുതിവെച്ച ശേഷം പുഴയിൽ ചാടിയ യുവാവിന്‍റെ മൃതദേഹം കിട്ടി. കോട്ടയം ആറുമാനൂര്‍ കൊറ്റത്തിൽ അലക്സാണ്ടറുടെ മകൻ ദീനു അലക്സിന്‍റെ മൃതദേഹമാണ് ഇല്ലിക്കലിൽ നിന്ന് കണ്ടെത്തിയത്. അറുമാനൂര്‍ കടവിൽ നിന്ന് ദിനുവിന്‍റെ ഫോൺ കിട്ടിയിരുന്നു. വെള്ളിയാഴ്ച പുലര്‍ച്ചെയാണ് ദീനുവിനെ കാണാതായത്.

ഇന്നലെയും എട്ടു മണിക്കൂറോളം അഗ്നിശമനസേനയുടെയും പോലീസിന്‍റെയും നാട്ടുകാരുടെയും നേതൃത്വത്തിൽ മീനച്ചിലാറ്റിൽ തെരച്ചിൽ നടത്തിയിരുന്നു. ആറുമാനൂര്‍ മുതൽ പൂവത്തുംമൂട് വരെയും നാഗമ്പടം പാലത്തിന് സമീപഭാഗത്തും തെരച്ചിൽ നടത്തി.

ഇതോടൊപ്പം സൈബര്‍ സെല്ലിന്‍റെ സഹായത്തോടെ മറ്റു തരത്തിലും പോലീസ് അന്വേഷണം നടത്തിയിരുന്നു. എന്നാൽ കഴിഞ്ഞ ദിവസം അന്വേഷണത്തിനെത്തിച്ച പോലീസ് നായ ആറുമാനൂര്‍ കടവിലേയ്ക്ക് തന്നെ രണ്ടു വട്ടവും മണം പിടിച്ച് ഓടിയതിനാലാണ് പ്രധാനമായും ആറ്റിൽ തന്നെ തെരച്ചിൽ നടത്തിയത്.

ലയണൽ മെസിയുടെ കടുത്ത ആരാധകനായ ദീനുവിന്‍റെ പുസ്തകങ്ങളിലെല്ലാം അര്‍ജന്‍റീനയെക്കുറിച്ചും മെസിയെക്കുറിച്ചുമുള്ള കുറിപ്പുകള്‍ കണ്ടെത്തിയിരുന്നു.