മനോരമ ലേഖകനെ 'തീയേറ്റ‍ര്‍ പീഡകനാ'ക്കി ബ്രിട്ടീഷ് മാധ്യമങ്ങള്‍

കൊച്ചി: മലപ്പുറം എടപ്പാളിൽ സിനിമ തീയേറ്ററിനുള്ളിൽ വെച്ച് പത്തുവയസുകാരി ലൈംഗികപീഡനത്തിന് ഇരയായ വാര്‍ത്ത അന്താരാഷ്ട്രമാധ്യമങ്ങള്‍ ഏറ്റെടുത്തതോടെ പൊല്ലാപ്പിലായത് വാര്‍ത്ത റിപ്പോര്‍ട്ട് ചെയ്ത മനോരമ ന്യൂസ് ലേഖകൻ. വാര്‍ത്ത റിപ്പോര്‍ട്ട് ചെയ്ത ചില ബ്രിട്ടീഷ് മാധ്യമങ്ങള്‍ കേസിലെ പ്രതി മൊയ്തീൻകുട്ടിയാണെന്ന് കാണിച്ച് പ്രസിദ്ധീകരിച്ചത് മനോരമ മലപ്പുറം ലേഖകൻ എസ് മഹേഷ് കുമാറിന്‍റെ ചിത്രം.

ബ്രിട്ടീഷ് മാധ്യമങ്ങളായ ഡെയിലി മെയിലും ദ സണ്ണുമാണ് വാര്‍ത്ത തെറ്റായ ചിത്രം ഉപയോഗിച്ച് പ്രസിദ്ധീകരിച്ചത്. മുൻപും തെറ്റായ വാര്‍ത്തകള്‍ പ്രസിദ്ധീകരിച്ച് പ്രശ്നം സൃഷ്ടിച്ചിട്ടുള്ളവയാണ് രണ്ട് മാധ്യമങ്ങളും.

ഡെയിലി മെയിലിലാണ് വാര്‍ത്ത ആദ്യം പ്രസിദ്ധീകരിക്കപ്പെട്ടത്. വാര്‍ത്തയുടെ ദൃശ്യങ്ങള്‍ക്കായി ഡെയിലി മെയിൽ ആശ്രയിച്ചത് മനോരമ ന്യൂസ് റിപ്പോര്‍ട്ടിനെയായിരുന്നു. റിപ്പോര്‍ട്ടിൽ ഫോണിൻ ആയി പ്രത്യക്ഷപ്പെട്ട മഹേഷ് കുമാറിന്‍റെ ചിത്രം കേസിലെ പ്രതി മൊയ്തീൻകുട്ടിയുടേതാണെന്ന് തെറ്റിദ്ധരിച്ചാണ് ബ്രിട്ടീഷ് പത്രം ഉപയോഗിച്ചത്. ഈ വാര്‍ത്ത ഇതേ ചിത്രം സഹിതം ദ സണ്ണും പ്രസിദ്ധീകരിക്കുകയായിരുന്നു.