ജൂൺ ഒന്നു മുതൽ വിദ്യാര്‍ഥികള്‍ക്ക് ഇളവ് നല്‍കില്ലെന്ന് ബസുടമകള്‍

കൊച്ചി: ജൂൺ ഒന്നു മുതൽ വിദ്യാര്‍ഥികള്‍ക്ക് ടിക്കറ്റ് നിരക്കിൽ ഇളവ് നല്‍കില്ലെന്ന് സംസ്ഥാനത്തെ സ്വകാര്യ ബസുടമകള്‍ അറിയിച്ചു. വിദ്യാര്‍ഥികള്‍ക്കുള്ള യാത്രാ ഇളവ് എടുത്തുകളയണമെന്ന് ആവശ്യപ്പെട്ട് കോടതിയെ സമീപിക്കാനും ബസുടമകളുടെ യോഗം തീരുമാനിച്ചിട്ടുണ്ട്.

വിദ്യാര്‍ഥികള്‍ക്ക് സൗജന്യനിരക്കിൽ യാത്രാസൗകര്യം ഒരുക്കണമെങ്കിൽ സര്‍ക്കാര്‍ സബ്സിഡിയും ഇളവുകളും അനുവദിക്കണമെന്നാണ് ബസുടമകളുടെ ആവശ്യം. അല്ലാത്ത പക്ഷം സൗജന്യനിരക്കിൽ ആരെയും ബസിൽ യാത്ര ചെയ്യാൻ അനുവദിക്കില്ലെന്നും ബസുടമാ പ്രതിനിധികള്‍ അറിയിച്ചു.

വിദ്യാര്‍ഥികള്‍ക്കുള്ള യാത്ര ഇളവിന് സബ്സിഡി നല്‍കണമെന്നും ഇന്ധനവില കുറയ്ക്കണമെന്നും ആവശ്യപ്പെട്ട് മെയ് എട്ടിന് സെക്രട്ടറിയേറ്റിനു മുന്നിൽ നിരാഹാരം നടത്തുമെന്നും ഭാരവാഹികള്‍ അറിയിച്ചു.