എന്ത് നേടാനാണ് ആ കുടുംബം സമരത്തിന് പോയതെന്ന് മുഖ്യമന്ത്രി

തിരുവനന്തപുരം: ജിഷ്ണു പ്രണോയിയുടെ മരണത്തിന് പിന്നിലുള്ളവരെ അറസ്റ്റ് ചെയ്യണമെന്ന് ആവശ്യപ്പെട്ട് കുടുംബാംഗങ്ങള്‍ ഡി.ജി.പി ഓഫീസിന് മുന്നില്‍ നടത്തിയ സമരത്തെ പലരും രാഷ്ട്രീയമായി ഉപയോഗിച്ചെന്ന് മുഖ്യമന്ത്രി പിണറായി വിജയന്‍ പറഞ്ഞു. എന്ത് നേടാനാണ് ആ കുടുംബം സമരത്തിന് പോയത്. ആവശ്യമുള്ളവയെല്ലാം സർക്കാർ ചെയ്തു കഴിഞ്ഞിരുന്നു. സംഭവിക്കാന്‍ പാടില്ലാത്ത കാര്യങ്ങളാണ് ഡി.ജി.പി ഓഫീസിന് മുന്നില്‍ ഉണ്ടായതെന്നും മന്ത്രിസഭാ യോഗത്തിന് ശേഷം മുഖ്യമന്ത്രി വാര്‍ത്താ സമ്മേളനത്തില്‍ പറഞ്ഞു.

ജിഷ്ണുവിന്റെ കേസില്‍ സര്‍ക്കാര്‍ ചെയ്യാനുള്ളതെല്ലാം ചെയ്തിട്ടുണ്ട്. മഹിജയ്ക്ക് ഉണ്ടായ മാനസിക ബുദ്ധിമുട്ട് എല്ലാവര്‍ക്കും മനസിലാവും. ഒരമ്മയുടെ മാനസികാവസ്ഥയെ ഇങ്ങനെ ഉപയോഗിക്കുന്നത് അംഗീകരിക്കാനാകില്ല. പാര്‍ട്ടിയെ അനുകൂലിക്കുന്ന ചിലര്‍ക്ക് പോലും എതിരഭിപ്രായമുണ്ടായി. ഡി.ജി.പി ഓഫീസിന് മുന്നിലുണ്ടായ സംഭവവുമായി ബന്ധപ്പെട്ട് പൊലീസിന് വീഴ്ച വന്നുവെന്ന് കണ്ടെത്തിയാല്‍ നടപടിയുണ്ടാകുമെന്ന് മുഖ്യമന്ത്രി ആവര്‍ത്തിച്ചു.

താന്‍ ഇടപെട്ടാല്‍ അത്ര പെട്ടെന്ന് തീരുന്ന സമരമായിരുന്നില്ല മഹിജയുടേത്. സമരം പെട്ടെന്ന് അവസാനിക്കാതിരിക്കാന്‍ ചിലര്‍ ശ്രമിച്ചു. ഇത് കണ്ടില്ലെന്ന് നടിക്കാനാവില്ല. എന്ത് ആവശ്യത്തിനായിരുന്നു സമരമെന്ന് വിലയിരുത്തേണ്ടതാണെന്നും പിണറായി പറഞ്ഞു. ജിഷ കേസിലെ സമരവുമായി ഇതിനെ താരതമ്യപ്പെടുത്തരുത്. ഉമ്മന്‍ചാണ്ടി എന്ന് മുതലാണ് ഷാജഹാന്റെ രക്ഷകനായതെന്ന് അറിയില്ല.

ഷാജഹാനോട് വ്യക്തിവിരോധം ഉണ്ടായിരുന്നെങ്കില്‍ നേരത്തെ തന്നെ നടപടിയെടുക്കാമായിരുന്നു. ഡി.ജി.പി ഓഫീസിന് മുന്നില്‍ ബഹളമുണ്ടാക്കിയതിനാണ് ഷാജഹാനെതിരെ നടപടി എടുത്തത്. സമരത്തില്‍, ജിഷ്ണുവിന്റെ അമ്മാവന്‍ ശ്രീജിത്തിന്റെ പങ്കെന്താണെന്ന് അറിയില്ല. എസ്.യു.സി. ഐ പ്രവര്‍ത്തകരുണ്ടായിരുന്നെന്ന് കുടുംബം തന്നെ പറഞ്ഞിട്ടുണ്ട്. സി.പി.എം കുടുംബമായിരുന്നെങ്കില്‍ എസ്.യു.സി.ഐക്കാര്‍ എങ്ങനെ ഇവരെ റാഞ്ചിയെന്നും മുഖ്യമന്ത്രി ചോദിച്ചു.

c m press meet at trivandrum

C M Pinarayi vijayan's press meet at trivandrum.