ജീവനക്കാര്‍ക്ക് ഇരുന്ന് ജോലി ചെയ്യാന്‍ നിയമ ഭേദഗതി

തിരുവനന്തപുരം: തുണിക്കടകള്‍ അടക്കമുള്ള വ്യാപാരസ്ഥാപനങ്ങളില്‍ ഇനി ജീവനക്കാര്‍ക്ക് ഇരുന്ന് ജോലി ചെയ്യാം. ഇത് സംബന്ധിച്ച നിയമം ഭേദഗതി ചെയ്യാന്‍ മന്ത്രിസഭ തീരുമാനിച്ചു. ദിവസം മുഴുവന്‍ നിന്ന് ജോലി ചെയ്യേണ്ടിവരുന്ന സെയില്‍സ് ജീവനക്കാരുടെ ദുരവസ്ഥക്കാണ് അവസാനമാകുന്നത്.

തുണിക്കടകളിലടക്കം ജീവനക്കാരെ ഇരിക്കാന്‍ അനുവദിക്കാത്തതിന് തൊഴിലുടമക്കെതിരെ പലയിടത്തും സമരങ്ങളും പ്രതിഷേധങ്ങളും ഉയര്‍ന്നിരുന്നു. ഷോപ്പ്സ് ആന്‍റ് എസ്റ്റാബ്ലിഷ്മെന്റ് ആക്ടില്‍ ഭേദഗതി വരുത്തിയാണ് ഇരിക്കാനുള്ള അവസരം ഒരുക്കുന്നത്. ജീവനക്കാര്‍ക്ക് കസേര ഉറപ്പാക്കാനുള്ള ബാധ്യത തൊഴിലുടമക്കാണ്.

ചട്ടങ്ങളില്‍ വീഴ്ച വരുത്തിയാല്‍ പിഴ നല്‍കണം. തൊഴിലുടമ നല്‍കേണ്ട പിഴ അയ്യായിരം രൂപ ആയിരുന്നത് ഒരു ലക്ഷമാക്കി. ആഴ്ചയിൽ ഒരിക്കൽ അവധി ദിനം നൽകിയില്ലെങ്കിൽ എണ്ണായിരം രൂപ എന്നത് രണ്ട് ലക്ഷവുമാക്കി. അപ്രന്‍റീസുകളെ തൊഴിലാളികളായി പരിഗണിക്കണം. ആഴ്ചയില്‍ ഒരു ദിവസം അവധി ദിനം ഉറപ്പാക്കണം എന്നിവയാണ് മറ്റ് ഭേദഗതികള്‍.