ദുരിതാശ്വാസ പാക്കേജില്‍ മന്ത്രിസഭാ തീരുമാനം ഇന്ന്

തിരുവനന്തപുരം: സംസ്ഥാനത്ത് മഴ മൂലമുണ്ടായ നാശനഷ്ടങ്ങള്‍ ലോക്‌സഭയിൽ ഇന്ന് ചര്‍ച്ച ചെയ്യും. കേരളത്തിന്റെയും കര്‍ണാടകത്തിന്റെയും ആവശ്യത്തെ തുടര്‍ന്നാണ് ഇന്ന് വിഷയം ചര്‍ച്ച ചെയ്യാമെന്ന് ലോക്‌സഭ തീരുമാനിച്ചിരിക്കുന്നത്. അഞ്ച് മണിക്കൂറാണ് ചര്‍ച്ചയ്ക്കായി മാറ്റിവെച്ചിരിക്കുന്നത്. മഴക്കെടുതി വിഷയം ദേശീയ ദുരന്തമായി പ്രഖ്യാപിക്കണമെന്നും അടിയന്തരമായി കേരളത്തിന് പ്രത്യേക സാമ്പത്തിക സഹായം വേണമെന്നും കേരളത്തിലെ എംപിമാര്‍ ചര്‍ച്ചയില്‍ ആവശ്യപ്പെടാനിരിക്കുകയാണ്. അതേസമയം ദുരിതാശ്വാസ പ്രവര്‍ത്തനങ്ങള്‍ക്കുള്ള പാക്കേജ് പ്രഖ്യാപിക്കുന്ന കാര്യത്തില്‍ ഇന്ന് ചേരുന്ന കേരളാ മന്ത്രിസഭായോഗം തീരുമാനമെടുക്കുമെന്നാണ് സൂചന.

ദുരന്ത നിവാരണസേന നല്‍കേണ്ട സഹായത്തെ കുറിച്ചും എംപിമാര്‍ സഭയിലുന്നയിക്കും. സഭ തുടങ്ങിയ അന്നുമുതല്‍ നിരന്തരം ഇരു സഭകളിലും മഴക്കെടുതി വിഷയം ഉന്നയിച്ചതിന്റെ അടിസ്ഥാനത്തിലാണ് അഞ്ചുമണിക്കൂര്‍ ഈ വിഷയം ചര്‍ച്ചയ്‌ക്കെടുക്കാമെന്ന് ലോക്‌സഭ തീരുമാനിച്ചിരിക്കുന്നത്.