വാർത്താസമ്മേളനം റദ്ദാക്കി; സമ്മർദ്ദത്തിനൊടുവിൽ കെവി തോമസ് തിരുവനന്തപുരത്തേയ്ക്ക് തിരിച്ചു

കൊച്ചി: നിയമസഭാ തെരഞ്ഞെടുപ്പ് അടുത്തു നിൽക്കേ ദിവസങ്ങള്‍ നീണ്ട സമ്മര്‍ദ്ദത്തിനൊടുവിൽ മുതിര്‍ന്ന കോൺഗ്രസ് നേതാവ് കെവി തോമസിനെ ഹൈക്കമാൻഡ് അനുനയിപ്പിച്ചതായി റിപ്പോര്‍ട്ടുകള്‍. രാഷ്ട്രീയനീക്കം വ്യക്തമാക്കാൻ ഇന്നു രാവിലെ പതിനൊന്ന് മണിയ്ക്ക് നടത്തുമെന്നു പറഞ്ഞ വാര്‍ത്താ സമ്മേളനം റദ്ദാക്കി കെവി തോമസ് തിരുവനന്തപുരത്തേയ്ക്ക് തിരിച്ചു. തലസ്ഥാനത്ത് എഐസിസി നേതാക്കളുമായി അദ്ദേഹം ചര്‍ച്ച നടത്തും.

ആവശ്യങ്ങള്‍ അംഗീകരിച്ചില്ലെങ്കിൽ കെവി തോമസ് ഇടതുമുന്നണിയുടെ ഭാഗമായേക്കുമെന്ന അഭ്യൂഹങ്ങള്‍ക്കൊടുവിൽ അദ്ദേഹത്തിന് കോൺഗ്രസ് കെപിസിസി വര്‍ക്കിങ് പ്രസിഡൻ്റ് സ്ഥാനം നല്‍കിയെന്നാണ് ഏഷ്യാനെറ്റ് ന്യൂസ് റിപ്പോര്‍ട്ട്. ഇന്നലെ വൈകിട്ടോടെ സോണിയ ഗാന്ധി ഇടപെട്ടതോടെയാണ് കെവി തോമസ് നിലപാട് മയപ്പെടുത്തിയത്. വാര്‍ത്താ സമ്മേളനം റദ്ദാക്കണമെന്ന് നേതാക്കള്‍ ആവശ്യപ്പെട്ടെങ്കിലും മുൻകൂട്ടി തീരുമാനിച്ച വാര്‍ത്താ സമ്മേളനം റദ്ദാക്കുന്നത് തെറ്റായ സന്ദേശം നല്‍കുമെന്ന് കെവി തോമസ് വ്യക്തമാക്കുകയായിരുന്നു. ഇതിനു പിന്നാലെ സോണിയ ഗാന്ധി ഇദ്ദേഹത്തെ നേരിട്ടു വിളിക്കുകയായിരുന്നുവെന്നാണ് റിപ്പോര്‍ട്ട്.

Also Read: മസിലു കുലുക്കിയാൽ കേരളത്തിലെ പാർട്ടി വളരുമോ? ഗുരുതര അഴിമതി ആരോപണവും, സുധാകരന് മുട്ടൻ പണിയുമായി കണ്ണൂരിലെ വിമത നേതാക്കൾ

കെവി തോമസ് പാര്‍ട്ടി വിടുമെന്നും ഇടതു സ്വതന്ത്രനായി മത്സരിക്കുമെന്നുമായിരുന്നു കഴിഞ്ഞ ദിവസങ്ങളിൽ നടന്ന പ്രചാരണം. എന്നാൽ ഉയര്‍ന്ന സ്ഥാനങ്ങള്‍ക്കു വേണ്ടി കെ വി തോമസ് ഉയര്‍ത്തുന്ന സമ്മര്‍ദ്ദം പരിഗണിക്കേണ്ടതില്ലെന്ന് കോൺഗ്രസ് നേതാക്കള്‍ തന്നെ വിലയിരുത്തിയിരുന്നു. ഇതിനൊടുവിലാണ് സോണിയ ഗാന്ധിയുടെ ഇടപെടൽ.

തന്നെ സോണിയ ഗാന്ധി നേരിട്ട് വിളിച്ചതായി രാത്രി കെവി തോമസ് മാധ്യമങ്ങളെ അറിയിക്കുകയായിരുന്നു. ഇന്നത്തെ യോഗത്തിൽ പങ്കെടുക്കണമെന്ന് ആവശ്യപ്പെട്ടെങ്കിലും സോണിയ ഗാന്ധി പറഞ്ഞതിനാൽ അത് തള്ളിക്കളയാൻ കഴിയില്ലെന്നും അദ്ദേഹം മാധ്യമങ്ങളോടു പ്രതികരിക്കുകയായിരുന്നു. തനിക്ക് ചില വിഷമങ്ങളുണ്ടെന്നും പാര്‍ട്ടിയിൽ നിന്ന് ചിലര്‍ ആക്ഷേപിച്ചെന്നും കെവി തോമസ് ആരോപിച്ചു. തദ്ദേശ തെരഞ്ഞെടുപ്പിൽ പല കാര്യങ്ങളിലും പാര്‍ട്ടിയിൽ നിന്ന് തനിക്ക് വേദനയുണ്ടായെന്നും കെവി തോമസ് പറഞ്ഞു.

Also Read: സഹപ്രവർത്തകർ അപമാനിച്ചെന്ന് കെവി തോമസ്; യോഗത്തിൽ പങ്കെടുക്കുമെന്ന് സോണിയ ഗാന്ധിക്ക് ഉറപ്പ് നൽകി

തന്‍റെ അടുത്ത ബന്ധുവിന് നിയമസഭാ തെരഞ്ഞെടുപ്പിൽ മത്സരിക്കാൻ സീറ്റ് നല്‍കണമെന്ന് കെവി തോമസ് ആവശ്യപ്പെട്ടതായി റിപ്പോര്‍ട്ടുകളുണ്ടായിരുന്നു. എന്നാൽ താൻ സ്ഥാനമാനങ്ങളൊന്നും ചോദിച്ചിട്ടില്ലെന്നും രാവിലെ നടക്കുന്ന യോഗത്തിനു ശേഷം പ്രതികരിക്കാമെന്നുമായിരുന്നു കെവി തോമസിൻ്റെ പ്രതികരണം. നേതൃത്വവുമായി ചര്‍ച്ച നടത്താൻ സോണിയ ഗാന്ധി നിര്‍ദേശിച്ചെന്നും സോണിയ ഗാന്ധി പറയുന്ന കാര്യം അനുസരിക്കുമെന്നും കെവി തോമസ് വ്യക്തമാക്കി.