ഊണ് വൈകി: ജീവനക്കാരനെ പിസി ജോര്‍ജ് മര്‍ദ്ദിച്ചതായി പരാതി

തിരുവനന്തപുരം: എംഎല്‍എ ഹോസ്റ്റല്‍ കന്റീന്‍ ജീവനക്കാരനെ പി.സി.ജോര്‍ജ് മര്‍ദ്ദിച്ചെന്ന് പരാതി. ഊണ് കൊണ്ടുവരാന്‍ 20 മിനിറ്റ് വൈകിയതിന് ജോര്‍ജും പിഎയും കൂടിയാണ് മര്‍ദ്ദിച്ചതെന്ന് കുടുംബശ്രീ ജീവനക്കാരനായ വട്ടിയൂര്‍ക്കാവ് സ്വദേശി മനു പറഞ്ഞു. കണ്ണിനും ചുണ്ടിനും പരുക്കേറ്റിട്ടുണ്ട്.

താന്‍ ആരെയെങ്കിലും തല്ലിയെന്ന ആരോപണം ലോകത്താരും വിശ്വസിക്കില്ലെന്ന് പിസി ജോ‍ർജ് പറഞ്ഞു. "ഉച്ചയ്ക്ക് ഒന്നരയോടെ ഹോസ്റ്റലിലെത്തി കന്റീനില്‍ വിളിച്ച്‌ ചോറുകൊണ്ടുവരാന്‍ അറിയിച്ചു. എന്നാല്‍ രണ്ടു മണി കഴിഞ്ഞിട്ടും അവര്‍ ചോറ് എത്തിച്ചില്ല. നാല്‍പ്പതുമിനിട്ട് കഴിഞ്ഞിട്ടും ചോറെത്തിക്കാത്തതിനെ തുടര്‍ന്ന് ചെറുതായി വഴക്കുപറഞ്ഞിരുന്നു. ഒരാള്‍ക്ക് ഊണ് ചോദിച്ചിട്ട് നാലുപേര്‍ക്കാണ് കൊണ്ടുവന്നത്. അതുകണ്ടപ്പോള്‍ മറ്റാരുടെയോ ചോറല്ലേ, അവര്‍ക്കു കൊണ്ടുകൊടുക്കെടായെന്നു കുറച്ചു കടുപ്പിച്ചു പറഞ്ഞു. അപ്പോള്‍ അവന്‍ ഇവിടെ കറിയില്ലെന്നു പറഞ്ഞു. തുടര്‍ന്ന് നീ കറിയുടെ കാര്യം ചോദിക്കെണ്ടാ ചോറെടുത്തുകൊണ്ടു പോകാന്‍ പറഞ്ഞു. പോടായെന്നു പറഞ്ഞത് അവന് ഇഷ്ടപ്പെട്ടില്ല.അത്ര മോശമായിട്ടാണ് അവന്‍ പെരുമാറിയത്. പരുക്കുണ്ടെങ്കില്‍ അതെവിടുന്നു കിട്ടിയെന്ന് ഞാന്‍ അന്വേഷിക്കാം" - ജോർജ് പറയുന്നു.

എന്നാൽ, തിരക്കായതുകൊണ്ടാണ് താമസിച്ചതെന്നും പറഞ്ഞപ്പോൾ ജോര്‍ജ് എഴുന്നേറ്റു വന്ന് അടിച്ചു. പിന്നാലെ പിഎയും രണ്ടുമൂന്നടിയടിച്ചു. പിന്നെ ഡ്രൈവറാണ് പിടിച്ചുമാറ്റിയത്. ഇനിയിവിടെ നില്‍ക്കേണ്ട പോയ്ക്കോളാന്‍ പറഞ്ഞുവെന്നും മനു പറഞ്ഞു.





English Summary: Canteen labour Manu file complien against MLA P.C George