പിതാവ് മരിച്ചിട്ടും അഭിലാഷിനെ തേടി അലോക് ആനന്ദ്

സിഡ്‌നി: ഇന്ത്യൻ നാവികൻ അഭിലാഷ് ടോമിയെ ഇന്ന് ഉച്ചയോടെ രക്ഷപ്പെടുത്തുമെന്ന് സൂചന. അതിനിടെ, പിതാവിന്റെ മരണവാർത്ത അറിഞ്ഞിട്ടും അഭിലാഷിനെ കണ്ടെത്താനുള്ള ശ്രമത്തിലാണ് ക്യാപ്റ്റൻ അലോക് ആനന്ദ. ഐഎൻഎസ് സത‍്‍പുര യുദ്ധക്കപ്പലിലെ കമാൻഡറാണ് ബിഹാർ സ്വദേശിയായ അലോക്.

ശ്രീലങ്കയ്ക്കും മാലെ ദ്വീപിനും ഇടയിൽ വെച്ച് അലോകിന് അഭിലാഷിനെ രക്ഷിക്കാനുള്ള നിർദേശം ലഭിച്ചതിനെ തുടർന്നാണ് രക്ഷാദൗത്യത്തിനായി പുറപ്പെട്ടത്. ഇന്നലെ രാവിലെ പിതാവ് മരിച്ചെന്നും കരയിലേക്ക് അലോകിന് മടങ്ങാമെന്ന് നിർദേശം ലഭിച്ചിട്ടും അഭിലാഷിനായുള്ള തെരച്ചിൽ തുടരാൻ അലോക് തീരുമാനിക്കുകയായിരുന്നു.അഭിലാഷിനെ രക്ഷിക്കാനുള്ള രക്ഷാദൗത്യം അവസാനഘട്ടത്തിലാണ്.

ഫ്രഞ്ച് കപ്പലായ ഒസിരിസ്‌ അഭിലാഷിന്റെ വഞ്ചിയുടെ അടുത്തെത്തി. ഒസിരിസിൽ നിന്ന് അഭിലാഷിനെ രക്ഷിക്കാൻ സോഡിയാക് ബോട്ടിറക്കി. ഇന്ത്യൻ നാവിക സേനയുടെ ദൗത്യസംഘവും സ്ഥലത്ത് എത്തിയിട്ടുണ്ട്. അഭിലാഷിന് പ്രാഥമിക ചികിത്സ നൽകാൻ തയ്യാറായി ഡോക്ടർ നാവിക സേനക്കൊപ്പമുണ്ട്. പയ്‌വഞ്ചിയുടെ തൂണ് തകർന്ന് വീണ് മുതുകിന് പരിക്കേറ്റ അഭിലാഷിന് ചലിക്കാനോ ഭക്ഷണം കഴിക്കാനോ പറ്റാത്ത അവസ്ഥയിലാണിപ്പോൾ.