ജന ഗണ മന പാടി രാജ്യം തെരുവില്‍ ഇറങ്ങണമെന്ന് പ്രശസ്ത കര്‍ണാടക സംഗീതജ്ഞന്‍ ടി എം കൃഷ്ണ. പ്രതിഷേധത്തിന്റെ ഗാനമാണ് ജന ഗണ മന. കോഴിക്കോട് നടക്കുന്ന കേരള ലിറ്ററേച്ചര്‍ ഫെസ്റ്റിവലിന് എത്തിയ ടി എം കൃഷ്ണ സമയം മലയാളത്തിന് നൽകിയ എക്‌സ്‌ക്ലൂസീവ് ഇന്റർവ്യൂ.
രാജ്യം കലുഷിതമായ കാലഘട്ടത്തിലൂടെയാണ് കടന്നു പോകുന്നത്..ഒരു വിപ്ലവത്തിലേക്കാണോ നാം നീങ്ങുന്നതെന്ന് തോന്നുന്നുണ്ടോ?
ഇന്ത്യ എന്ന സങ്കൽപത്തോട് ഏറെ ചേർന്ന് നിൽക്കുന്ന ആശയങ്ങളുടെയും ജനാധിപത്യത്തിന്റെയും ആഘോഷമാണ് ഇപ്പോൾ നടക്കുന്നത്. യുവാക്കൾ ഭയരഹിതരായി മുന്നോട്ട് വരുന്നു എന്ന് സംഗീതഞ്‍ജനായ ടി.എം കൃഷ്ണ പറഞ്ഞു. വിപ്ലവത്തിലേക്കണോ നാം നീങ്ങുന്നതെന്ന് ഇപ്പോൾ വ്യക്തമാക്കാൻ കഴിയില്ലെന്നും ടി.എം കൃഷ്ണ കൂട്ടിച്ചേർത്തു.ദളിത് ശബ്ദങ്ങൾ കൂടുതലായി കേൾക്കുന്ന സമയം കൂടിയാണിത്. സുപ്രധാനമായ ഒരു സമയത്തിൽ കൂടിയാണ് രാജ്യം കടന്നു പോകുന്നതെന്ന് നിസംശയം പറയാമെന്നും ടി.എം കൃഷ്ണ കൂട്ടിച്ചേർത്തു.
കല കലക്ക് വേണ്ടിയുള്ളതോ അതോ സമൂഹത്തിന് വേണ്ടിയുള്ളതോ?
കലക്ക് സമൂഹവുമായോ രാഷ്ട്രീയവുമായോ ബന്ധമില്ലെന്ന് വ്യാഖ്യാനിക്കുന്നത് തന്നെ വലിയ തെറ്റാണ്. കല തന്നെയാണ് സമൂഹം, രാഷ്ട്രീയം, തത്വശാസ്ത്രം, മാറ്റം എന്ന് വ്യാഖ്യാനിച്ചാൽ കല കലക്ക് വേണ്ടിയുള്ളതാണെന്ന് പറയുന്നത് തന്നെയാകും ശരിയെന്ന് ടി.എം കൃഷ്ണ മറുപടി നൽകി.
പൗരത്വ നിയമത്തിനെതിരെ പ്രതികരിക്കുന്ന യുവാക്കളെ കുറിച്ച് എന്താണ് അഭിപ്രായം?
അവിശ്വസനീയം. ഇന്ത്യൻ യുവത്വം സർഗാത്മകത, രാഷ്ട്രീയം,സംസ്‌കാരം എന്നിവയെ കുറിച്ച് നമ്മെ പഠിപ്പിച്ചു. മുതിർന്നവർ അവരെ ശ്രദ്ധിക്കുകയും അവരിൽ നിന്ന് പാഠങ്ങൾ ഉൾക്കൊള്ളുകയും വേണം. ഞാനുൾപ്പെടുന്ന തലമുറയാണ് ഇന്ത്യയിലെ പ്രശനങ്ങൾക്ക് കരണക്കാരായത്. യുവത്വമാണ് രാജ്യത്തിന് മുന്നോട്ട് പോകാനുള്ള വഴി കാണിക്കുന്നത്.
'പ്രതീക്ഷയുടെ സൂര്യൻ ഉദിക്കുന്നു' എന്ന് ടാഗോർ പറഞ്ഞു. 110 വർഷങ്ങൾക്ക് ശേഷം ഈ വചനം വീണ്ടും പറയാനുള്ള സമയമായോ?
ഇത് നാം പറയേണ്ടത് ബിജെപിയോടും ആർഎസ്എസിനോടുമാണ്. ദേശയീഗാനത്തിലെ പ്രതീക്ഷയുടെ പൊൻകിരണം ഉദയം ചെയ്യുന്നു എന്ന് പരാമർശിക്കുന്ന ഭാഗം ഇന്ത്യൻ ജനത പാടിക്കൊണ്ട് തെരുവിലിറങ്ങേണ്ട സമയമായെന്ന് ടി.എം കൃഷ്ണ പറഞ്ഞു. നിങ്ങളുടെ സായം തീർന്നുവെന്ന് ബിജെപിയോട് തുറന്ന് പറയേണ്ട സമയമാണിത്. യുവത്വമാണ് ഇന്ത്യയുടെ ശബ്ദം. ഇന്ത്യയുടെ ആത്മാവിനെ രാജ്യം വീണ്ടെടുക്കുക തന്നെ ചെയ്യുമെന്നും ടി.എം കൃഷ്ണ കൂട്ടിച്ചേർത്തു.
ജന ഗണ മന എന്ന ദേശീയ ഗാനം മാത്രമല്ല, മുഴുവൻ വരികളും നാം ഓരോരുത്തരും വായിക്കണമെന്നും അറിയണമെന്നും ടി.എം കൃഷ്ണ ആവശ്യപ്പെട്ടു. വ്യത്യസ്ത മതങ്ങളെ കുറിച്ചും ഭയമില്ലായ്മയെ കുറിച്ചും ടാഗോർ പ്രതിപാദിച്ചിട്ടുണ്ട്. ഇവയെല്ലാം ഓരോ ഭാരതീയനും അറിയണമെന്നും ടി.എം കൃഷ്ണ കൂട്ടിച്ചേർത്തു.