വിചാരണയില്ല: സിപിഎം നേതാക്കൾക്ക് എതിരായ കേസ് ഒഴിവാക്കി

കൊച്ചി: സിപിഎം നേതാക്കൾക്കെതിരെ നിലനിന്നിരുന്ന രാഷ്ട്രീയ സംഘർഷ കേസുകൾ വിചാരണ കൂടാതെ ഒഴിവാക്കി. മുഖ്യമന്ത്രി പിണറായി വിജയനും ചില മന്ത്രിമാർക്കും എതിരെയുള്ള കേസുകളും ഇത്തരത്തിൽ ഒഴിവാക്കപ്പെട്ടു. തിരുവനന്തപുരം മ്യൂസിയം, കന്റോൺമെന്റ് പോലീസ് സ്റ്റേഷനുകളിൽ നിലനിന്നിരുന്ന കേസുകളാണ് ഇവ.

മുഖ്യമന്ത്രി പിണറായി വിജയൻ, മന്ത്രിമാരായ കടകംപള്ളി സുരേന്ദ്രൻ, കെ.കെ.ശൈലജ, പി.കെ.ശ്രീമതി, എം.സ്വരാജ് എംഎൽഎ, ജയിംസ് മാത്യു എംഎൽഎ, ടി.വി.രാജേഷ് എംഎൽഎ, സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ, എം.വിജയകുമാർ എന്നിവർക്കെതിരെയുള്ള കേസുകളാണ് ഒഴിവാക്കിയത്. കേസുകൾ പിൻവലിക്കണമെന്ന് ആവശ്യപ്പെട്ട് പ്രോസിക്യൂഷൻ അപേക്ഷ സമർപ്പിച്ചിരുന്നു. എറണാകുളം അഡീഷണൽ ചീഫ് ജുഡീഷ്യൽ മജിസ്‌ട്രേറ്റ് കോടതിയാണ് അപേക്ഷ പരിഗണിച്ച് തീരുമാനമെടുത്തത്.