കന്യാസ്ത്രീക്ക് വധഭീഷണി: വൈദികന്‍റെ സഹോദരനെതിരെ കേസ്

കോട്ടയം: ജലന്ധർ ബിഷപ്പായിരുന്ന ഫ്രാങ്കോ മുളയ്ക്കലിനെതിരെ പരാതി നൽകിയ കന്യാസ്ത്രീക്ക് വധഭീഷണിയുണ്ടെന്ന പരാതിയിൽ പോലീസ് കേസെടുത്തു. ജലന്ധർ രൂപതയിലെ വൈദികൻ ഫാദർ ലോറൻസ് ചാട്ടുപ്പറമ്പിലിന്റെ സഹോദരന്‍ തോമസിനെതിരെയാണ് കേസെടുത്തിരിക്കുന്നത്.

കന്യാസ്ത്രീയുടെ സഹോദരി ഇന്നലെ കാലടി പോലീസ് സ്റ്റേഷനിൽ ജീവനും സ്വത്തിനും സംരക്ഷണം വേണമെന്ന് കാണിച്ച് പരാതി നൽകിയിരുന്നു. ഈ പരാതിയിൽ പോലീസ് മറ്റൊരു കേസ് കൂടി തോമസിനെതിരെ റജിസ്റ്റർ ചെയ്തിട്ടുണ്ട്. തന്നെയും മകനെയും തോമസ് വധിക്കുമെന്ന് ഭീഷണിപ്പെടുത്തിയതായാണ് സഹോദരിയുടെ പരാതി.

കന്യാസ്ത്രീ താമസിക്കുന്ന കുറവിലങ്ങാട് മഠത്തിലെ ജീവനക്കാരൻ തോമസിനെതിരെ പൊലീസിന് മൊഴി നൽകി. കന്യാസ്ത്രീ ഉപയോഗിക്കുന്ന വാഹനത്തിന്റെ ബ്രേക്ക് അഴിച്ചു വിടണമെന്നും ടയറിന്റെ കാറ്റ് അഴിച്ചു വിടണമെന്നും ജീവനക്കാരന് തോമസ് നിർദേശം നൽകിയിരുന്നു. കന്യാസ്ത്രീ മഠത്തിന് പുറത്ത് പോകുന്നത് അടക്കമുള്ള കാര്യങ്ങൾ തോമസിനെ അറിയിക്കണമെന്നും നിർദേശം നൽകിയിരുന്നു.