മുഖ്യമന്ത്രിയെ അധിക്ഷേപിച്ച മുൻ സൈനികനെതിരെ കേസ്

തിരുവനന്തപുരം: മുഖ്യമന്ത്രി പിണറായി വിജയനെ അധിക്ഷേപിച്ച് ഫേസ്ബുക്കിൽ വീഡിയോ പോസ്റ്റ് ചെയ്തയാൾ മുൻ സൈനികനാണെന്ന് സൈബർ പോലീസ്. പത്തനംതിട്ട കടമ്മനിട്ട സ്വദേശി ഉണ്ണി എസ് നായര്‍ എന്നയാളാണ് ഫെയ്ബുക്കില്‍ പോസ്റ്റ് ഇട്ടതെന്ന് മാതൃഭൂമി റിപ്പോർട്ട് ചെയ്യുന്നു.

ഇയാള്‍ മുന്‍ സൈനികനാണെന്നും ഇപ്പോള്‍ ഡിഫന്‍സ് സെക്യൂരിറ്റി കോറിലാണ് പ്രവര്‍ത്തിക്കുന്നതെന്നും പോലീസ് അറിയിച്ചെന്നാണ് റിപ്പോർട്ട്. ആള്‍മാറാട്ടം, പൊതുജനശല്യം എന്നീ വകുപ്പുകള്‍ പ്രകാരം കേസെടുക്കും.

സൈനിക യൂണിഫോമിൽ എത്തിയാണ് ഇദ്ദേഹം സാമൂഹ്യമാധ്യമങ്ങളില്‍ വീഡിയോ പോസ്റ്റ് ചെയ്തത്. എന്നാല്‍ ഇദ്ദേഹം സൈനികനല്ലെന്ന് കരസേനാ വക്താവ് ട്വിറ്ററില്‍ വ്യക്തമാക്കിയിരുന്നു.

ഞായറാഴ്ച രാവിലെയാണ് ചില വാട്സ്പ്പ് ഗ്രൂപ്പുകളിലേയ്ക്ക് സര്‍ക്കാരിനെ വിമര്‍ശിച്ചുകൊണ്ടുള്ള സന്ദേശങ്ങള്‍ എത്തിയത്. രക്ഷാപ്രവര്‍ത്തനം പൂര്‍ണമായി സൈന്യത്തിനെ ഏല്‍പ്പിക്കണമെന്നായിരുന്നു ആവശ്യം.

സൈന്യം ഭരണം പിടിച്ചെടുക്കുമെന്ന ഭയമാണോ സംസ്ഥാന സര്‍ക്കാരിനെന്നും വീഡിയോയില്‍ പറയുന്നു.