ശബരിമലയിലെ വ്യാജവാര്‍ത്ത; ജനം ടിവിക്കെതിരെ കേസെടുത്തു

തിരുവനന്തപുരം: ശബരിമല വിഷയത്തിൽ വ്യാജവാര്‍ത്ത പ്രചരിപ്പിച്ചതിനെതിരെ ജനം ടി.വിയ്‌ക്കെതിരെ കേസെടുത്തു. എടത്തല പാലാഞ്ചേരി മുകള്‍ തേജസില്‍ ശശികല റഹീം നൽകിയെ പരാതിയിലാണ് കേസെടുത്തിരിക്കുന്നത്. റൂറല്‍ ജില്ലാ പൊലീസിന് നല്‍കിയ പരാതിയെത്തുടര്‍ന്നാണ് എടത്തല പൊലീസ് കേസെടുത്തത്.

ശശികലയുടെ മരുമകള്‍ സുലേഖ തോമസ് ശബരിമലയ്ക്ക് പോയെന്ന രീതിയിൽ വ്യാജവാര്‍ത്ത ജനം ടി.വി നവംബര്‍ നാലിന് സംപ്രേഷണം ചെയ്തിരുന്നു.മരുമകളെ സ്വീകരിക്കാന്‍ ശശികല പമ്പയിലേക്ക് പോയെന്നും വാര്‍ത്തയില്‍ ഉണ്ടായിരുന്നു. ശബരിമലയിൽ സംഘര്‍ഷം ഉണ്ടാക്കുകയെന്ന ലക്ഷ്യത്തോടെ വാര്‍ത്ത പ്രചരിപ്പിച്ച കുറ്റത്തിനാണ് കേസെടുത്തിട്ടുള്ളതെന്ന് എടത്തല എസ്ഐ അരുണ്‍ പറഞ്ഞു. ജനാധിപത്യ മഹിളാ അസോസിയേഷന്‍ മുന്‍ ഏരിയസെക്രട്ടറി കൂടിയാണ് ശശികല റഹിം.

നവംബർ 5ന് ചിത്തിര ആട്ടവിശേഷത്തോടനുബന്ധിച്ച് ശബരിമല നട തുറന്നപ്പോഴാണ് വ്യാജവാര്‍ത്തയുമായി ബി.ജെ.പി അനുഭാവ വാര്‍ത്തകള്‍ പ്രേക്ഷപണം ചെയ്യുന്ന ജനം ടി.വി രംഗത്തെത്തിയിരുന്നത്.