'ജാതി സംഘടനകള്‍ക്ക് കേരളത്തിന്‍റെ വിധി നിര്‍ണയിക്കാനുള്ള കെല്‍പ്പില്ല'; പ്രതികരണവുമായി വിഎസ്

തിരുവനന്തപുരം: ഉപതെരഞ്ഞെടുപ്പ് ഫലപ്രഖ്യാപനത്തിനു പിന്നാലെ സാമുദായിക സംഘടനകൾക്കെതിരെ രൂക്ഷവിമർശനവുമായി സിപിഎം നേതാവ് വിഎസ് അച്യുതാനന്ദൻ. ജാതി സംഘടനകള്‍ക്ക് കേരളത്തിന്‍റെ വിധി നിര്‍ണയിക്കാനുള്ള കെല്‍പ്പില്ല എന്നാണ് ഉപതെരഞ്ഞെടുപ്പുകളുടെ ഫലം സൂചിപ്പിക്കുന്നതെന്നും അദ്ദേഹം പറഞ്ഞു.

ജാതി സംഘടനകൾക്കെതിരായ ജനങ്ങളുടെ ഈ മനോഭാവമാണ് വാസ്തവത്തിൽ നവോത്ഥാനത്തിന്‍റെ സൂചനയെന്നും വിഎസ് ഫേസ്ബുക്ക് പോസ്റ്റിലൂടെ പറഞ്ഞു. രാഷ്ട്രീയ പാർട്ടികൾ തിരിച്ചറിയേണ്ടതും ഭാവി പ്രവർത്തനങ്ങളിൽ ഉൾപ്പെടുത്തേണ്ടതുമായ കാര്യമാണിതെന്നും വിഎസ് പറയുന്നു.

Also Read: എൽഡിഎഫും യുഡിഎഫും സാമുദായിക ധ്രുവീകരണം നടത്തിയെന്ന് കെ സുരേന്ദ്രൻ

'വിശ്വാസവും വൈകാരികതയും ഹിന്ദുത്വവുമൊന്നും കേരള ജനതയുടെ മനസ്സിലേക്കിറങ്ങിയിട്ടില്ല എന്നും ഈ തെരഞ്ഞെടുപ്പ് ഫലം സൂചിപ്പിക്കുന്നുണ്ട്. വട്ടിയൂര്‍ക്കാവിലെ തെരഞ്ഞെടുപ്പ് യോഗത്തില്‍ പ്രസംഗിക്കുമ്പോള്‍ ഞാന്‍ ഇക്കാര്യം ചൂണ്ടിക്കാട്ടിയിരുന്നു.' വിഎസ് പറയുന്നു.

യുഡിഎഫിന്‍റെ പാളയത്തിൽ പട തുടങ്ങിക്കഴിഞ്ഞിരിക്കുകയാണെന്ന് പറഞ്ഞ വിഎസ് വട്ടിയൂര്‍ക്കാവിലെ ഇടതുപക്ഷ വിജയം ആദ്യം പ്രഖ്യാപിച്ചത് യുഡിഎഫ് സ്ഥാനാര്‍ത്ഥിതന്നെയായിരുന്നെന്നും കൂട്ടിച്ചേർത്തു. കോന്നിയിലേതും രാഷ്ട്രീയ വിജയംതന്നെയെന്ന് പറഞ്ഞ അദ്ദേഹം വിശ്രമിക്കാന്‍ ഒരു നിമിഷംപോലും ബാക്കിയില്ലാത്ത മുന്നണിയാണ് എല്‍ഡിഎഫ് എന്ന തിരിച്ചറിവും ആവശ്യമാണെന്ന് പറഞ്ഞാണ് പോസ്റ്റ് അവസാനിപ്പിക്കുന്നത്.