ശബരിമലയിൽ വനിതകൾക്ക് സുരക്ഷ ഉറപ്പാക്കണമെന്ന് കേന്ദ്രസർക്കാർ

ന്യൂഡൽഹി: ശബരിമലയിൽ എല്ലാ പ്രായത്തിലുമുള്ള സ്ത്രീകളെ പ്രവേശിക്കാൻ അനുവദിക്കുന്ന കോടതിവിധിയ്ക്ക് പിന്നാലെയുണ്ടായ സംഘര്‍ഷാവസ്ഥ നിലയ്ക്കലിലും പരിസരത്തും തുടരുന്നതിനിടെ വിഷയത്തിൽ ഇടപെട്ട് കേന്ദ്രസര്‍ക്കാര്‍. ശബരിമല ദര്‍ശനത്തിനെത്തുന്ന വനിതകള്‍ക്ക് ആവശ്യമായ സുരക്ഷ ഉറപ്പാക്കണമെന്ന് കേന്ദ്ര ആഭ്യന്തരമന്ത്രാലയം നിര്‍ദേശം നല്‍കിയതായി വാര്‍ത്താ ഏജൻസിയായ പിടിഐ റിപ്പോര്‍ട്ട് ചെയ്തു. വിധിയെത്തുടര്‍ന്ന് കേരളത്തിൽ ഉടനീളമുണ്ടാകുന്ന പ്രതിഷേധപ്രകടനങ്ങളിൽ സുരക്ഷ ഉറപ്പാക്കണമെന്നും നിര്‍ദേശമുണ്ട്.

സന്നിധാനത്ത് ക്രമസമാധാനം ഉറപ്പാക്കേണ്ടതിന്‍റെ ഉത്തരവാദിത്തം സംസ്ഥാനസര്‍ക്കാരിനാണെന്നും സുപ്രീം കോടതി വിധി പൂര്‍ണ്ണമായും നടപ്പാക്കാൻ സംസ്ഥാന സര്‍ക്കാര്‍ സുരക്ഷ ഉറപ്പാക്കണമന്നുമാണ് ആഭ്യന്തര മന്ത്രാലയത്തിലെ ഉദ്യോഗസ്ഥനെ ഉദ്ധരിച്ച് പിടിഐ റിപ്പോര്‍ട്ട് ചെയ്തിരിക്കുന്നത്. വനിതകള്‍ ശബരിമലയിലേയ്ക്ക് എത്തുന്നത് തടഞ്ഞാൽ അത് കോടതിയലക്ഷ്യമാകുമെന്നതിനാലാണ് 15ന് തന്നെ നിര്‍ദേശം നല്‍കിയതെന്നും ഉദ്യോഗസ്ഥൻ പറയുന്നു.

അതേസമയം, വിധി നടപ്പാക്കുമെന്നും സന്നിധാനത്തെ ക്രമസമാധാനം നിയന്ത്രണവിധേയമാണെന്ന് കേരളം അറിയിച്ചിട്ടുണ്ടെന്നും മറ്റൊരു ഉദ്യോഗസ്ഥൻ അറിയിച്ചു.