ബിനീഷിൻ്റെ ചോദ്യം ചെയ്യൽ നാലാം ദിവസം; ബിനാമി ഇടപാടുകള്‍ അന്വേഷിക്കാൻ ഇഡി

തിരുവനന്തപുരം: ബെംഗളൂരു ലഹരിമരുന്ന് ഇടപാട് കേസുമായി ബന്ധപ്പെട്ട് അറസ്റ്റിലായ ബിനീഷ് കോടിയേരിയുടെ ചോദ്യം ചെയ്യൽ തുടരുന്നു. മൂന്നാം ദിവസവും ചോദ്യം ചെയ്യലിനായി ബിനീഷിനെ ഇഡി ഓഫീസിലെത്തിച്ചതായി വാര്‍ത്താ ചാനലുകൾ റിപ്പോര്‍ട്ട് ചെയ്തു. കേസ് ബിനീഷ് സ്വന്തം നിലയ്ക്ക് നേരിടണമെന്നും ഉത്തരവാദിത്തമേറ്റെടുത്ത് അച്ഛനും സിപിഎം സംസ്ഥാന സെക്രട്ടറിയുമായ കോടിയേരി ബാലകൃഷ്ണൻ പദവി ഒഴിയേണ്ടതില്ലെന്നും പാര്‍ട്ടി ഇന്നലെ നിലപാടെടുത്തിരുന്നു. അതേസമയം, ലഹരിമരുന്ന് കേസുമായി ബന്ധപ്പെട്ട് തിരുവനന്തപുരത്തെ ബിനാമി ഇടപാടുകളിലേയ്ക്ക് അന്വേഷണം നീട്ടുകയാണ് കേന്ദ്ര ഏജൻസികള്‍.

ചോദ്യം ചെയ്യലിനായി ഓഫീസിലെത്തിച്ചപ്പോള്‍ കോളറിൽ പിടിച്ച ഉദ്യോഗസ്ഥരോട് ബിനീഷ് കയര്‍ത്തു സംസാരിച്ചതായി മനോരമ ന്യൂസ് റിപ്പോര്‍ട്ട് ചെയ്തു.

Also Read: കേരളത്തിന്റെ തുടര്‍ച്ചയായ പുരോഗതിക്കായി പ്രാര്‍ത്ഥിക്കുന്നു; മലയാളത്തില്‍ കേരളപ്പിറവി ആശംസകള്‍ നേര്‍ന്ന് പ്രധാനമന്ത്രി

കേസിൽ അറസ്റ്റിലായ അനൂപ് മുഹമ്മദും ബിനീഷ് കോടിയേരിയുമായും അടുത്ത ബന്ധമുള്ള ചിലരുടെ ബിനാമി ഇടപാടുകളെപ്പറ്റി അന്വേഷണം ആരംഭിച്ചതായാണ് റിപ്പോര്‍ട്ടുകള്‍. ഇവരിൽ ചിലരുടെ സാമ്പത്തിക സ്ഥിതിയിൽ അടുത്തിടെ വലിയ വര്‍ധനവുണ്ടായെന്നും ഇത് മയക്കുമരുന്ന് ഇടപാട് വഴിയുള്ള സമ്പാദ്യമാണോ എന്ന് കേന്ദ്ര ഏജൻസികള്‍ അന്വേഷിക്കുകയാണെന്ന് മാതൃഭൂമി റിപ്പോര്‍ട്ട്. അരുവിക്കര വട്ടക്കുളം സ്വദേശിയായ ഒരാളെ ഉടൻ ചോദ്യം ചെയ്തേക്കുമെന്നും റിപ്പോര്‍ട്ടിൽ പറയുന്നുണ്ട്.

Also Read: വീണ്ടും ഭീകരാക്രമണം: ഫ്രാന്‍സിൽ പള്ളിക്ക് പുറത്ത് പുരോഹിതന് നേരെ വെടിവയ്പ്പ്; അക്രമി പിടിയിൽ

ഇയാളുടെ പേരിൽ അടുത്തിടെ രണ്ട് ലാൻഡ്റോവര്‍ എസ്‍‍യുവികളും ഒരു ബെൻസ് കാറും രജിസ്റ്റര്‍ ചെയ്തിട്ടുണ്ടെന്നും നിരവധി ആഡംബര കാറുകള്‍ ഉപയോഗിക്കുന്ന ഇയാള്‍ക്ക് പറയത്തക്ക ജോലിയെ ബിസിനസ് പശ്ചാത്തലമോ ഇല്ലെന്നുമാണ് മാതൃഭൂമി റിപ്പോര്‍ട്ട്.

തിരുവനന്തപുരം വഴുതക്കാട്ടെ ബിനീഷിൻ്റെ ഫ്ലാറ്റിൽ അനൂപ് മുഹമ്മദ് ഉള്‍പ്പെടെയുള്ളവര്‍ ഒത്തുകൂടിയിരുന്നതായും ഈ സംഭവത്തെക്കുറിച്ചും ഇഡി അന്വേഷിക്കുന്നതായും റിപ്പോര്‍ട്ടുണ്ട്.

അതേസമയം, ലഹരിമരുന്ന് കേസിൽ നാര്‍ക്കോട്ടിക് കൺട്രോള്‍ ബ്യൂറോ നടത്തുന്ന അന്വേഷണം മലയാള സിനിമാ മേഖലയിലേയ്ക്ക് വ്യാപിച്ചെന്നാണ് മറ്റൊരു റിപ്പോര്‍ട്ട്. അറസ്റ്റിലായ അനൂപിൻ്റെയും ബിനീഷിൻ്റെ സിനിമാബന്ധങ്ങള്‍ സംബന്ധിച്ച് എൻസിബി സോണൽ ഡയറക്ടര്‍ അമിത് ഗവാട്ടെ വിവരങ്ങള്‍ ശേഖരിച്ചു.