കേരളത്തിന് 30 വിമാന സ‍ര്‍വീസുകള്‍; കൊച്ചി മെട്രോയുടെ അടുത്ത ഘട്ടം ഉടനെന്നും കേന്ദ്രം

ന്യൂഡല്‍ഹി: കേരളത്തിലേക്ക് 30 വിമാന സര്‍വീസുകള്‍ കൂടി കേന്ദ്രം അനുവദിച്ചു. മുഖ്യമന്ത്രി പിണറായി വിജയന്‍ വ്യോമയാന മന്ത്രി ഹര്‍ദീപ് സിങ് പുരിയുമായി നടത്തിയ കൂടിക്കാഴ്‍ചയിലാണ് ഇതുസംബന്ധിച്ച് തീരുമാനമെടുത്തത്. ഉത്സവ സീസണില്‍ വിദേശത്ത് നിന്നടക്കം കൂടുതല്‍ യാത്രക്കാര്‍ കേരളത്തിലേക്ക് വരുന്നത് കണക്കിലെടുത്താണ് തീരുമാനം. കൊച്ചി മെട്രോ റെയിലിന്‍റെ അടുത്ത ഘട്ടം ഉടന്‍ ആരംഭിക്കുമെന്നും കേന്ദ്ര മന്ത്രി പറഞ്ഞു.

ആഭ്യന്തര, അന്താരാഷ്ട്ര സര്‍വീസുകളിലെ യാത്രക്കാരുടെ വര്‍ധന പരിഗണിച്ച് വിമാന കമ്പനികള്‍ക്ക് കൂടുതല്‍ ഇളവുകള്‍ നല്‍കണമെന്ന് കേരളം ആവശ്യപ്പെട്ടു. വിമാന കമ്പനികള്‍ ഉയര്‍ന്ന നിരക്ക് ഈടാക്കുന്ന കാര്യവും മുഖ്യമന്ത്രി വ്യോമയാന മന്ത്രിയുടെ ശ്രദ്ധയില്‍പെടുത്തി.

കരിപ്പൂര്‍ വിമാനത്താവളത്തില്‍ നിന്ന് കൂടുതല്‍ വിമാന സര്‍വീസുകള്‍ തുടങ്ങുന്നതുമായി ബന്ധപ്പെട്ട ഉന്നതതല യോഗം ഒക്ടോബറില്‍ ഡല്‍ഹിയില്‍ ചേരുമെന്ന് മന്ത്രി ഹര്‍ദീപ് സിങ് പുരി നേരത്തെ എം.കെ.രാഘവന്‍ എം.പി.യെ അറിയിച്ചിരുന്നു. വ്യോമയാന മന്ത്രാലയ സെക്രട്ടറി, ഡി.ജി.സി.എ., എയര്‍ ഇന്ത്യ, എയര്‍ ഇന്ത്യ എക്സ്‍പ്രസ്, സ്വകാര്യ വിമാന കമ്പനികള്‍ എന്നിവരാണ് യോഗം ചേരുക. ഏറെക്കാലമായി കരിപ്പൂര്‍ വിമാനത്താവളം കടുത്ത അവഗണനയാണ് നേരിടുന്നത് എം.കെ.രാഘവന്‍ എം.പി. ചൂണ്ടിക്കാട്ടിയിരുന്നു.