നവകേരളത്തിന് വിദേശഫണ്ട്: വീണ്ടും വിലങ്ങുതടിയിട്ട് കേന്ദ്രം

തിരുവനന്തപുരം: കേരളത്തിന്‍റെ പുനര്‍നിര്‍മാണത്തിന് പണം സ്വരൂപിക്കാൻ മുഖ്യമന്ത്രി പിണറായി വിജയനും മന്ത്രിമാരും നടത്താൻ നിശ്ചയിച്ചിരുന്ന വിദേശയാത്രയ്ക്ക് തടസ്സവുമായി കേന്ദ്രം. മന്ത്രിമാരുടെ വിദശേയയാത്രയ്ക്ക് ഇതുവരെ കേന്ദ്രാനുമതിയായില്ല. മുഖ്യമന്ത്രിയ്ക്ക് മാത്രമാണ് നിലവിൽ അനുമതി നല്‍കിയിരിക്കുന്നത്.

മുഖ്യമന്ത്രിയും 17 മന്ത്രിമാരും ഒരുമിച്ചാണ് വിദേശയാത്രയ്ക്ക് അനുമതി ചോദിച്ചിരുന്നത്. എന്നാൽ കേന്ദ്രം മുഖ്യമന്ത്രിയ്ക്ക് മാത്രം അനുമതി നല്‍കിക്കൊണ്ട് ഉത്തരവ് ഇറക്കുകയായിരുന്നു. കര്‍ശന ഉപാധികളും കേന്ദ്രം മുന്നോട്ട് വെച്ചിട്ടുണ്ട്.

വിദേശപ്രതിനിധികളുമായി ചര്‍ച്ച നടത്തരുതെന്നും വിദേശഫണ്ട് സ്വീകരിക്കരുതെന്നും നിര്‍ദേശമുണ്ട്. ദുരിതാശ്വാസവുമായി ബന്ധപ്പെട്ടുള്ള യോഗങ്ങളിൽ മാത്രമേ പങ്കെടുക്കാവൂ എന്നും നിര്‍ദേശമുണ്ട്.

ഇതോടൊപ്പം കേന്ദ്രം സംസ്ഥാനത്തിന്‍റെ വായ്പാപരിധി ഉയര്‍ത്താതെ വിദേശത്തുനിന്ന് വായ്പകള്‍ സ്വീകരിക്കാനാവില്ലെന്നതിനാൽ ലോകബാങ്ക് - എഡിബി വായ്പകളും അനിശ്ചിതത്വത്തിലാണെന്നും ആക്ഷേപമുണ്ട്.