കേന്ദ്രത്തിൻ്റെ കാലവര്‍ഷക്കെടുതി സഹായം അപര്യാപ്തം: റവന്യു മന്ത്രി

തിരുവനന്തപുരം: കേരളത്തിന് പ്രളയക്കെടുതിയെ അതിജീവിക്കാൻ കേന്ദ്രം അനുവദിച്ച അടിയന്തര ധനസഹായം അപര്യാപ്തമാണെന്ന് റവന്യു മന്ത്രി ഇ.ചന്ദ്രശേഖരന്‍. സംസ്ഥാനത്തിന് ദുരന്ത നിവാരണ പാക്കേജ് അനുവദിക്കണമെന്ന് മന്ത്രി ആവശ്യപ്പെട്ടു. ലഭിച്ച തുക കൊണ്ട് അത്യാവശ്യം ചെയ്യേണ്ട കാര്യങ്ങള്‍ ചെയ്യുമെന്നും മന്ത്രി കൂട്ടിച്ചേ‍ര്‍ത്തു.

കേന്ദ്ര സര്‍ക്കാരില്‍ നിന്ന് ധനസഹായം സംബന്ധിച്ച വിഷയത്തില്‍ അനുകൂല നിലപാടുണ്ടാകുമെന്നാണ് പ്രതീക്ഷയെന്ന് മന്ത്രി പ്രത്യാശ പ്രകടിപ്പിച്ചു. ബാണാസുര സാഗര്‍ അണക്കെട്ടിന്‍റെ ഷട്ടറുകള്‍ ഉയര്‍ത്തിയത് മുന്നറിയിപ്പ് നൽകാതെയാണെന്നതുമായി ബന്ധപ്പെട്ട് ഉയര്‍ന്ന ആരോപണങ്ങളെ പറ്റിയുള്ള ചോദ്യങ്ങളെ മന്ത്രി ചിരിച്ചുതള്ളി. ഈ അവസരത്തില്‍ വിവാദ വിഷയങ്ങളില്‍ പ്രതികരിക്കാന്‍ തയ്യാറല്ലെന്നാണ് മന്ത്രി ഇതിനോട് പ്രതികരിച്ചത്.