ന്യൂനമര്‍ദം: മൂന്നു ദിവസം സംസ്ഥാനത്ത് ശക്തമായ മഴയ്ക്ക് സാധ്യത

തിരുവനന്തപുരം: ജൂലൈ 17 വരെ മൂന്നുദിവസം സംസ്ഥാനത്ത് കനത്ത മഴയ്ക്ക് സാധ്യത. ബംഗാള്‍ ഉള്‍ക്കടലിൽ രൂപപ്പെട്ട ന്യൂനമര്‍ദ്ദമാണ് മഴ ശക്തിപ്പെടാൻ കാരണം. ശക്തമായ കാറ്റിനും സാധ്യതയുള്ളതിനാൽ മത്സ്യത്തൊഴിലാളികള്‍ കടലിൽ പോകരുത്. കേരളത്തിന്‍റെയും ലക്ഷദ്വീപിന്‍റെയും തീരങ്ങളിൽ മണിക്കൂറിൽ 35 - 54 കി.മി വേഗത്തിൽ കാറ്റുവീശാനാണ് സാധ്യത. ഇത് 60 കിലോമീറ്റര്‍ വരെയായി കൂടാം.

ഒഡീഷ തീരത്ത് രൂപപ്പെട്ട ന്യൂനമര്‍ദം ശക്തിപ്രാപിക്കുമോയെന്ന് പറയാറായിട്ടില്ലെങ്കിലും കേരള, കര്‍ണാടക തീരങ്ങളിൽ കാറ്റിന് വേഗം കൂടാൻ ഇത് കാരണമാകും. വടക്കൻ കേരളത്തിലും മലയോരമേഖലകളിലും കൂടുതൽ മഴയ്ക്ക് സാധ്യതയുണ്ടെന്ന് കാലാവസ്ഥാനിരീക്ഷണകേന്ദ്രം ഡയറക്ടര്‍ കെ സന്തോഷ് പറഞ്ഞു.

അതേസമയം, തിരുവനന്തപുരം, കൊല്ലം ജില്ലകളിൽ മഴ കനക്കാൻ സാധ്യതയില്ല. തെക്കുപടിഞ്ഞാറൻ കാലവര്‍ഷം തെക്കൻ കേരളത്തിൽ വലിയ മഴയ്ക്ക് കാരണമാകാറില്ലെന്നതാണ് ദീര്‍ഘകാല അനുഭവം.

കാറ്റിന് വേഗമേറുന്നതുമൂലം അറബിക്കടൽ പ്രക്ഷുബ്ധമാകാൻ സാധ്യതയുള്ളതിനാലാണ് മത്സ്യത്തൊഴിലാളികള്‍ക്ക് മുന്നറിയിപ്പ്. സ്ഥിതിഗതികള്‍ വിലയിരുത്തിയ ശേഷം ആവശ്യമെങ്കിൽ മുന്നറിയിപ്പ് നീട്ടും.

കഴിഞ്ഞ ദിവസം കേരളത്തിൽ ശക്തമായ മഴയാണ് പെയ്തത്. മൂന്നാറിലാണ് ഏറ്റവും കൂടുതൽ മഴ. (102.2 മില്ലിമീറ്റര്‍)