എം ശിവശങ്കറിനെതിരെ ഇഡി കുറ്റപത്രം രണ്ടാഴ്ചക്കുള്ളില്‍

കൊച്ചി: എന്‍ഫോഴ്സ്മെന്‍റ് ഡയറക്ടറേറ്റ് രജിസ്റ്റർ ചെയ്ത കേസില്‍ മുഖ്യമന്ത്രിയുടെ മുന്‍ പ്രിൻസിപ്പൽ സെക്രട്ടറി എം ശിവശങ്കറിനെതിരെയുള്ള കുറ്റപത്രം രണ്ടാഴ്ചക്കുള്ളില്‍ നല്‍കും. ശിവശങ്കര്‍ അറസ്റ്റിലായിട്ട് ഈ മാസം 29 ന് 60 ദിവസം പൂര്‍ത്തിയാകുന്ന സാഹചര്യത്തിലാണ് നടപടിയെന്ന് ഏഷ്യാനെറ്റ് ന്യൂസാണ് റിപ്പോർട്ട് ചെയ്തത്.

എം ശിവശങ്കറിനെതിരായി ഇപ്പോൾ കുറ്റപത്രം സമർപ്പിക്കുമെങ്കിലും കള്ളപ്പണം, ബിനാമി ഇടപാടുകളിലെ അന്വേഷണം തുടരുമെന്നാണ് റിപ്പോർട്ട്. പിന്നീട് ഇതിന്‍റെ അടിസ്ഥാനത്തിലുള്ള കുറ്റപത്രവും സമർപ്പിക്കും.

Also Read : ടോൾ പ്ലാസകൾ പിടിച്ചെടുക്കും; ഡൽഹി - ജയ്പൂർ ഹൈവേ ഉപരോധിക്കാൻ കർഷകർ; തിരക്കിച്ച ചർച്ചകളിൽ കേന്ദ്രം

വിദേശത്തേക്ക് ഡോളർ കടത്തിയതിലും ശിവശങ്കറിനെതിരെ ഇഡി അന്വേഷണം നടത്തുമെന്നാണ് ഏഷ്യാനെറ്റ് ന്യൂസ് റിപ്പോർട്ട് ചെയ്യുന്നത്. ഹൈക്കോടതിയിലെ ഉന്നത ഐടി ടീമിന്‍റെ നിയമനത്തിൽ ശിവശങ്കർ ഇടപെട്ടെന്ന ആരോപണങ്ങളുടെ പശ്ചാത്തലത്തിൽ നിയമനവുമായി ബന്ധപ്പെട്ട നടപടിക്രമങ്ങൾ പരിശോധിക്കുന്നതായി കഴിഞ്ഞദിവസം വാർത്ത പുറത്ത് വന്നിരുന്നു.

Also Read: രാജ്യത്ത് കൊവിഡ് കേസുകൾ 98 ലക്ഷം കടന്നു; 33,494 പേർക്ക് കൂടി രോഗമുക്തി

ഐടി ടീം നിയമന വിഷയത്തിൽ ചീഫ് ജസ്റ്റീസിന്‍റെ നി‍ർദേശപ്രകാരം, ജസ്റ്റീസ് മുഹമ്മദ് മുഷ്താഖ് വസ്തുതാ വിവര റിപ്പോർട്ട് തയാറാക്കിയെന്ന് ഏഷ്യാനെറ്റ് ന്യൂസാണ് റിപ്പോർട്ട് ചെയ്തത്. ഐടി പാ‍ർക്കിലെ സ്വപ്ന സുരേഷിന്‍റെ നിയമനത്തിന് പിന്നാലെ ചട്ടങ്ങൾ മറികടന്ന് ഹൈക്കോടതിയിൽ ഉന്നത ഐടി ടീമിനെ ശിവശങ്കർ ഇടപെട്ട് നിയമിച്ചെന്നാണ് ഉയർന്നിരിക്കുന്ന ആരോപണം.