ചട്ടം മറികടന്ന് ദേവസ്വം നിയമനം: തുഷാര്‍ വെള്ളാപ്പള്ളിയ്ക്കെതിരെ കുറ്റപത്രം

കൊച്ചി: ഗുരുവായൂര്‍ ദേവസ്വം ബോര്‍ഡിൽ ചട്ടങ്ങള്‍ മറികടന്ന് നിയമനം നടത്തിയെന്ന കേസിൽ ബിഡിജെഎസ് അധ്യക്ഷൻ തുഷാർ വെള്ളാപ്പള്ളിയ്ക്കെതിരെ വിജിലൻസിന്‍റെ കുറ്റപത്രം. രണ്ട് ഉദ്യോഗസ്ഥരെ ചട്ടങ്ങള്‍ മറികടന്ന് ഉയര്‍ന്ന തസ്തികയിൽ നിയമിച്ചു എന്നതാണ് കേസ്. ദേവസ്വം ബോര്‍ഡ് ചെയര്‍മാനായിരുന്ന ടി വി ചന്ദ്രമോഹനും കേസിൽ പ്രതിയാണ്.

നിയമനങ്ങളിൽ അഴിമതി നടത്തിയിട്ടുണ്ടെന്നാണ് വിജിലൻസിന്‍റെ റിപ്പോര്‍ട്ട്. പ്രതികളെ പ്രോസിക്യൂട്ട് ചെയ്യാൻ വിജിലൻസ് അനുമതി തേടിയിട്ടുണ്ട്. തുഷാര്‍ വെള്ളാപ്പള്ളി ദേവസ്വം ബോര്‍ഡ് അംഗമായിരുന്ന കാലത്ത് രഞ്ജിത്ത്, രാജു എന്നീ ഉദ്യോഗസ്ഥരെയാണ് ഉയര്‍ന്ന തസ്തികയിൽ നിയമിച്ചത്.

കൊടുങ്ങല്ലൂര്‍ സ്വദേശി നല്‍കിയ പരാതിയുടെ പിന്നാലെ ഏഴുപേരെ പ്രതിയാക്കി കേസ് രജിസ്റ്റര്‍ ചെയ്യുകയായിരുന്നു. പുതിയ നിയമം അനുസരിച്ച് ദേവസ്വം ബോര്‍ഡ് ഭാരവാഹികളായിരുന്നവരെയും പബ്ലിക് സെര്‍വന്‍റായി കണക്കാക്കുന്നുണ്ട്. സര്‍ക്കാരിൽ നിന്ന് അനുമതി ലഭിച്ചാലുടൻ വിജിലൻസ് കോടതിയിൽ കുറ്റപത്രം സമര്‍പ്പിക്കും.