അഭിമന്യു വധക്കേസില്‍ കുറ്റപത്രം സമര്‍പ്പിച്ചു

കൊച്ചി: എറണാകുളം മഹാരാജാസ് കോളേജ് വിദ്യാര്‍ത്ഥിയും എസ്എഫ്ഐ ഇടുക്കി ജില്ലാ കമ്മിറ്റിയംഗവുമായിരുന്ന അഭിമന്യുവിനെ കുത്തിക്കൊലപ്പെടുത്തിയ കേസില്‍ അന്വേഷണസംഘം കുറ്റപത്രം സമര്‍പ്പിച്ചു. എറണാകുളം ജുഡീഷ്യല്‍ മജിസ്ട്രേറ്റ് കോടതിയിലാണ് കുറ്റപത്രം സമര്‍ർപ്പിച്ചിരിക്കുന്നത്. കുറ്റപത്രത്തില്‍ അഭിമന്യുവിന്‍റെ സഹപാഠികളടക്കം 16 പേരെയാണ് പ്രതി ചേര്‍ത്തിരിക്കുന്നത്.

കേസിലെ അന്വേഷണ ഉദ്യോഗസ്ഥനായ ടിഎസ് സുരേഷ് കുമാറാണ് കോടതിയില്‍ കുറ്റപത്രം സമര്‍പ്പിച്ചത്. പ്രതികളില്‍ രണ്ട് പേര്‍ അഭിമന്യുവിന്‍റെ സഹപാഠികളും മറ്റ് പതിനാല് പേര്‍ ക്യാമ്പസ് ഫ്രണ്ടിന്‍റെ ജില്ലാ-സംസ്ഥാന നേതാക്കളുമാണ്. പ്രതികള്‍ക്ക് ജാമ്യം ലഭിക്കുന്ന സാഹചര്യം ഒഴിവാക്കുന്നതിനായാണ് കൃത്യം നടന്ന് 86ാം ദിവസം തന്നെ അന്വേഷണ സംഘം കുറ്റപത്രം സമര്‍പ്പിച്ചിരിക്കുന്നത്.