മുരുകന്റെ മരണം: ആറ് ഡോക്ടര്‍മാര്‍ പ്രതികളാകുമെന്ന് അന്വേഷണ സംഘം

കൊല്ലം: തമിഴ്‌നാട് സ്വദേശി മുരുകന്‍ ചികിത്സ ലഭിക്കാതെ മരിച്ച സംഭവത്തില്‍ ആറ് ഡോക്ടര്‍മാര്‍ പ്രതികളാകുമെന്ന് അന്വേഷണ സംഘം. തിരുവനന്തപുരം മെഡിക്കല്‍ കോളേജിലെ രണ്ട് ഡോക്ടര്‍മാര്‍, കൊല്ലം മെഡിട്രിന, മെഡിസിറ്റി ആശുപത്രികളിലെ നാല് ഡോക്ടര്‍മാര്‍ എന്നിവരെയാണ് പ്രതിപട്ടികയിലുള്‍പ്പെടുത്തിയത്.

മുരുകന്റെ മരണവുമായി ബന്ധപ്പെട്ട് സംസ്ഥാന ആരോഗ്യവകുപ്പ് വിശദമായ റിപ്പോര്‍ട്ട് തയ്യാറാക്കിയിരുന്നു. പോലീസ് നിരവധി തവണ ആവശ്യപ്പെട്ടെങ്കിലും ആരോഗ്യവകുപ്പ് റിപ്പോര്‍ട്ട് ഇതുവരെ കൈമാറിയിരുന്നില്ല. ഈ റിപ്പോര്‍ട്ട് ലഭിച്ച ശേഷം അറസ്റ്റ് ഉള്‍പ്പെടെയുള്ള നടപടികളുമായി മുന്നോട്ടുപോകാനാണ് പോലീസ് നീക്കമെന്നാണ് സൂചന.

കഴിഞ്ഞ ഓഗസ്റ്റിലാണ് തമിഴ്‌നാട് സ്വദേശിയായ മുരുകന് അപകടത്തില്‍ ഗുരുതരമായി പരിക്കേറ്റത്. തുടര്‍ന്ന് കൊല്ലത്തെയും തിരുവനന്തപുരത്തെയും ആശുപത്രികളില്‍ ചികിത്സയ്ക്കായി എത്തിച്ചെങ്കിലും വിവിധകാരണങ്ങള്‍ ചൂണ്ടിക്കാണിച്ച് ചികിത്സ നിഷേധിക്കപ്പെടുകയായിരുന്നു.