ചെങ്ങന്നൂ‍ര്‍ നാളെ പോളിങ് ബൂത്തിലേക്ക്: ഇന്ന് നിശബ്ദ പ്രചാരണം

ചെങ്ങന്നൂർ ഉപതിരഞ്ഞെടുപ്പിന് നാളെ ജനവിധി. ഇന്ന് നിശബ്ദ പ്രചാരണം നടക്കും. സ്ഥാനാര്‍ഥികളെല്ലാം വോട്ടുറപ്പിക്കാനുള്ള അവസാന വട്ട തിരക്കിലമര്‍ര്‍ന്നപ്പോൾ പോളിങ് സാമഗ്രികളുടെ വിതരണം രാവിലെ 8 മണിക്ക് ആരംഭിച്ചു. ചെങ്ങന്നൂര്‍ ക്രിസ്ത്യന്‍ കോളജിലാണ് പോളിങ് സാമഗ്രികൾ വിതരണം ചെയ്യുന്നത്. 164 ബൂത്തുകളിലേക്കായി 1200 ഉദ്യോഗസ്ഥരെ സജ്ജരാക്കിയിട്ടുണ്ട്. നാളെ രാവിലെ ഏഴ് മണിയോടെ തന്നെ വോട്ടെടുപ്പ് ആരംഭിക്കും.

രണ്ടര മാസം നീണ്ട തെരഞ്ഞെടുപ്പ് പ്രചാരണത്തിന് കൊട്ടിക്കലാശമായപ്പോള്‍, വാശിയേറിയ ത്രികോണ മത്സരത്തിൽ മൂന്ന് മുന്നണികളും വൻ ഭൂരിപക്ഷത്തോടെയുള്ള വിജയമാണ് പ്രതീക്ഷിക്കുന്നത്. മണ്ഡലത്തിന്‍റെ സമഗ്ര വികസനം മുതല്‍ കക്ഷി രാഷ്ട്രീയ സാധ്യതകള്‍ വരെ തെരഞ്ഞെടുപ്പു പ്രചരണ വേദികളിൽ ചൂടുള്ള ചര്‍ച്ചയ്ക്ക് വഴിയിട്ടു. തെരഞ്ഞെടുപ്പിന്‍റെ ജനവിധിയിൽ മതസാമുദായിക സമവാക്യങ്ങളും നിര്‍ണായകമാണെന്നതാണ് ശ്രദ്ധേയം.