ചെങ്ങന്നൂർ: സജി ചെറിയാൻ സിപിഎം സ്ഥാനാർഥിയായേക്കും

ചെങ്ങന്നൂർ: സിപിഎം ആലപ്പുഴ ജില്ലാ സെക്രട്ടറി സജി ചെറിയാൻ ചെങ്ങന്നൂർ ഉപതെരഞ്ഞെടുപ്പിൽ ഇടത് മുന്നണി സ്ഥാനാർഥിയായേക്കും. നാളെ സംസ്ഥാന സെക്രട്ടറി കോടിയേരി ബാലകൃഷ്ണൻ പങ്കെടുക്കുന്ന ജില്ലാ കമ്മിറ്റിയിൽ അന്തിമ തീരുമാനമുണ്ടായേക്കും. കോൺഗ്രസിൽ സ്ഥാനാർഥി നിർണയം തലവേദനയായിരിക്കുകയാണ്. പി.സി.വിഷ്‌ണുനാഥ്‌ സ്ഥാനാർഥിയാകാൻ തപര്യമില്ലെന്ന് അറിയിച്ചതിനെ തുടർന്നാണ് കോൺഗ്രസ് സ്ഥാനാർഥി നിർണയം സങ്കീർണമായത്.

മുൻ എംഎൽഎ എം.മുരളി, കെപിസിസി അംഗം ഡി.വിജയകുമാർ, മകൾ ജ്യോതി വിജയകുമാർ എന്നിവരുടെ പേരുകളും പരിഗണന പട്ടികയിലുണ്ട്. ജ്യോതി വിജയകുമാർ കോളജ് അധ്യാപികയാണ്. സജി ചെറിയാൻ തന്നെയാണ് ഇടത് പക്ഷത്തിന്‍റെ മികച്ച സ്ഥാനാർത്ഥിയെന്നാണ് പാർട്ടിയുടെ വിലയിരുത്തൽ. സിപിഎം ജില്ലാ സെക്രട്ടറി സ്ഥാനത്ത് നിന്ന് സജി ചെറിയാനെ മാറ്റുന്നത് പാർട്ടി നേതൃത്വത്തെ കുഴപ്പിക്കുന്ന മറ്റൊരു പ്രശ്‌നമാണ്. പെയിന്‍ ആന്റ് പാലിയേറ്റിവ് ഉള്‍പ്പടെയുള്ള ജീവകാരുണ്യമേഖലയില്‍ മണ്ഡലത്തില്‍ സ്വാധീനമുളളത് അനുകൂലഘടകങ്ങളില്‍ ഒന്നായാണ് വിലയിരുത്തല്‍.

വിജയം സര്‍ക്കാരിന്‍റെ ഭരണനേട്ടങ്ങളുടെ വിലയിരുത്തലാകുന്ന തിരഞ്ഞെടുപ്പില്‍ കരുത്തനായ സ്ഥാനാര്‍ഥി തന്നെ വേണമെന്നാണ് പാര്‍ട്ടിതീരുമാനം. പി.എസ്.ശ്രീധരൻ പിള്ളയുടെ പേര് മാത്രമാണ് ബിജെപി ഇപ്പോൾ പരിഗണിക്കുന്നത്. ദേവസ്വം ബോർഡ് പ്രസിഡന്‍റ് എ.പത്മകുമാർ, സി.എസ്. സുജാത എന്നിവരുടെ പേരുകളും സിപിഎം പട്ടികയിലുണ്ട്.