ആര്‍ എസ് എസിനെതിരെ നടപടിയെടുക്കാന്‍ സിപിഎമ്മിന് മനപ്രയാസം; ചെന്നിത്തല

കോഴിക്കോട്: ആർ എസിനെതിരെ പരസ്യമായി സംസാരിക്കുകയും രഹസ്യമായി അവരെ സഹായിക്കുകയും ചെയ്യുന്ന നയമാണ് പിണറായി സർക്കാർ പുലർത്തുന്നതെന്ന് പ്രതിപക്ഷ നേതാവ് രമേശ് ചെന്നിത്തല. സംഘപരിവാറിനും ആര്‍ എസ് എസിനുമെതിരെ നടപടിയെടുക്കാന്‍ സി പി എമ്മിന് വല്ലാത്ത മനപ്രയാസമാണ്. ഇതിന്‍റെ ഒടുവിലത്തെ ഉദാഹരണമാണ് ജില്ലാ ഭരണകൂടത്തിന്റെ പോലും വിലക്ക് ലംഘിച്ച് ആര്‍ എസ്എ സ് ദേശീയ അധ്യക്ഷന്‍ മോഹന്‍ ഭാഗവത് പാലക്കാട് മുത്താംതറ കരണകിയമ്മന്‍ ഹയര്‍സെക്കന്‍ഡറി സ്‌കൂളില്‍ ദേശീയ പതാക ഉയര്‍ത്തിയതെന്നും ചെന്നിത്തല വ്യക്തമാക്കി

തന്‍റെ ഫേസ്ബുക്ക് പോസ്റ്റിലൂടെയാണ് ചെന്നിത്തല സിപിഎമ്മിനെതിരെ വിമര്‍ശനമുന്നയിച്ചിരിക്കുന്നത്. സ്പര്‍ദ്ധ വളര്‍ത്തുന്ന വീഡിയോ ഫേസ്ബുക്കില്‍ ഷെയര്‍ ചെയ്ത ബി ജെ പി സംസ്ഥാന പ്രസിഡന്റ് കുമ്മനം രാജശേഖരനെതിരെ എടുത്ത കേസിലെ തുടര്‍നടപടികള്‍ എവിടെയോ തങ്ങി നില്‍ക്കുന്നു. മതവിദ്വേഷം വമിപ്പിക്കുന്ന പ്രസംഗം നടത്തുന്ന കെ പി ശശികലയ്ക്കു എതിരായി കേസ് എടുക്കുന്നതേയില്ല.

കൊലവിളി പ്രസംഗത്തിന്റെ പേരില്‍ കെ സുരേന്ദ്രനെതിരായ നടപടി മാസങ്ങളായി ആലോചനയില്‍ മാത്രം ഒതുങ്ങി നില്‍ക്കുന്നു. ക്ഷേത്രങ്ങൾ ആയുധപ്പുരകളാക്കുന്ന ആർ എസ്എ സിനെ ഇപ്പൊ ശരിപ്പെടുത്തികളയും എന്ന് ആക്രോശിച്ചു എത്തിയ മന്ത്രിമാർ ഇതെല്ലാം മറന്ന മട്ടാണ്. ആര്‍ എസ്എ സും സി പി എമ്മും പാലൂട്ടുന്ന ശത്രുക്കളാണെന്ന് താന്‍ പല തവണ ചൂണ്ടിക്കാട്ടിയിട്ടുണ്ടെന്നും ചെന്നിത്തല ഫേസ്ബുക്കില്‍ കുറിച്ചു..



Chennithala lashes CPM in his facebook post

Opposition leader Ramesh chennithala's face book against cpm