ചെങ്ങന്നൂര്‍ പരാജയം: ഉത്തരവാദിത്തം ഏറ്റെടുത്ത് ചെന്നിത്തല

കൊച്ചി: ചെങ്ങന്നൂര്‍ ഉപതെരഞ്ഞെടുപ്പിൽ യുഡിഎഫിന്‍റെ പരാജയത്തിന്‍റെ ഉത്തരവാദിത്തം ഏറ്റെടുക്കുന്നതായി പ്രതിപക്ഷനേതാവ് രമേശ് ചെന്നിത്തല. അതേസമയം, തോൽവിയുടെ കാരണം ഒന്നോ രണ്ടോ പേരുടെ തലയിൽ കെട്ടിവെയ്ക്കാനാവില്ലെന്നും എല്ലാവര്‍ക്കും ഉത്തരവാദിത്തമുണ്ടെന്നും രമേശ് ചെന്നിത്തല പറഞ്ഞു. എറണാകുളത്ത് കെഎസ്‍‍യുവിന്‍റെ പരിപാടിയിൽ സംസാരിക്കുകയായിരുന്നു ചെന്നിത്തല.

ഇതേപരിപാടിയിൽ വെച്ച് ഇന്നു രാവിലെ കെഎസ്‍‍യു സംസ്ഥാന പ്രസിഡന്‍റ് കെ എം അഭിജിത്ത് മുതിര്‍ന്ന നേതാക്കളെ വേദിയിലിരുത്തി വിമര്‍ശനം അഴിച്ചുവിട്ടിരുന്നു. കോൺഗ്രസ് സംഘടനാസംവിധാനം അഴിച്ചു പണിയണമെന്നും നേതാക്കളുടെ ശൈലി മാറ്റണമെന്നുമായിരുന്നു വിമര്‍ശനം.

ചെങ്ങന്നൂര്‍ ഉപതെരഞ്ഞെടുപ്പിൽ കോൺഗ്രസ് സ്ഥാനാര്‍ഥി ഡി വിജയകുമാറിനെ 20956 വോട്ടുകള്‍ക്ക് പരാജയപ്പെടുത്തിയാണ് എൽഡിഎഫ് സ്ഥാനാര്‍ഥി സജി ചെറിയാൻ വിജയം കൊയ്തത്. പരാജയകാരണം ഗ്രൂപ്പുകളിയാണെന്നും സംഘടനാദൗര്‍ബല്യമാണെന്നും ചൂണ്ടിക്കാട്ടി നിരവധി നേതാക്കള്‍ രംഗത്തെത്തിയിരുന്നു.