'അനാവശ്യ അനൗണ്‍സ്‌മെന്‍റ് ഒന്നും വേണ്ട'; അവതാരകയെ തടഞ്ഞ് മുഖ്യമന്ത്രി

തിരുവനന്തപുരം: ഉദ്ഘാടന ചടങ്ങില്‍ വിശിഷ്ടാതിഥിയെ ക്ഷണിച്ച ശേഷം സദസ്സിനോട് എഴുന്നേല്‍ക്കാനുള്ള അവതാരകയുടെ അഭ്യര്‍ഥന തടഞ്ഞ് മുഖ്യമന്ത്രി പിണറായി വിജയന്‍. നിലവിളക്ക് കൊളുത്തി ഉദ്ഘാടനത്തിനായി വിശിഷ്ടാതിഥിയെ ക്ഷണിച്ചശേഷം സദസ്സിനോട് എഴുന്നേല്‍ക്കാന്‍ പരിപാടിയുടെ അവതാരക അഭ്യര്‍ഥിച്ചപ്പോഴായിരുന്നു മുഖ്യമന്ത്രി തടഞ്ഞത്. തിരുവനന്തപുരം മസ്‌കറ്റ് ഹോട്ടലില്‍ നടന്ന കേരള റിയല്‍ എസ്‌റ്റേറ്റ് റെഗുലേറ്ററി അതോറിറ്റിയുടെ ഉദ്ഘാടന വേളയിലായിരുന്നു സംഭവം.

കൈവിളക്ക് കയ്യിലെടുത്തുകൊണ്ട് മുഖ്യമന്ത്രി പിന്നിലേക്ക് തിരിഞ്ഞുകൊണ്ട് അവതാരകയോട് അനാവശ്യ അനൗണ്‍സ്‌മെന്റ് ഒന്നും വേണ്ടായെന്ന് നിര്‍ദേശിക്കുകയായിരുന്നു. ഇതോടെ നിലവിളക്ക് കൊളുത്തുന്ന വേളയില്‍ എഴുന്നേല്‍ക്കണോ ഇരിക്കണോയെന്ന കുഴപ്പത്തിലായി സദസ്സിലുള്ളവര്‍ മുഴുവന്‍. തുടര്‍ന്ന്, എഴുന്നേല്‍ക്കാന്‍ തുടങ്ങിയ സദസ്സിനോട് ഇരിക്കാനും മുഖ്യമന്ത്രി കൈകൊണ്ട് ആംഗ്യം കാട്ടി.

അതിനുശേഷം, വേദിയില്‍ നിന്നും ഇറങ്ങിയ മുഖ്യമന്ത്രിയെ വിശിഷ്ടാതിഥികളില്‍ ചിലര്‍ ഹോട്ടലിന്റെ കവാടം വരെ അനുഗമിക്കാന്‍ തുനിഞ്ഞപ്പോഴും അദ്ദേഹം വിലക്കി. ചടങ്ങില്‍ എ സി മൊയ്തീന്‍, കെഡ്രായ് കേരള ചെയര്‍മാന്‍ എസ് കൃഷ്ണകുമാര്‍ എന്നിവര്‍ പങ്കെടുത്തു.