തിരുവനന്തപുരം: ലോക ബോഡി ബിൽഡിങ് ചാംപ്യൻഷിപ്പിൽ മിസ്റ്റർ വേൾഡ് ആയ ചിത്തരേഷ് നടേശന് കേരള സർക്കാരിന്റെ ജോലി വാഗ്ദാനം. മന്ത്രി കടകംപള്ളി സുരേന്ദ്രനാണ് ഇക്കാര്യം വ്യക്തമാക്കിയത്. യുവജനക്ഷേമബോർഡ് ഒരുക്കിയ സ്വീകരണ പരിപാടിയ്ക്കിടെയായിരുന്നു സംഭവം.
സ്വീകരണ പരിപാടിക്കിടെ ശരീരം ഇതിനായി തയ്യാറാക്കുന്നതിനെക്കുറിച്ച് മന്ത്രി ചോദിച്ചപ്പോഴാണ് ചിത്തരേഷ് ബോഡി ബിൽഡിങ്ങിനുള്ള കഷ്ടപാടുകളെക്കുറിച്ച് പറഞ്ഞത്. ദിവസവും 40 മുട്ടയും ഒരു കിലോ ചിക്കനും കഴിക്കുമെന്ന് താരം പറഞ്ഞപ്പോൾ ഇങ്ങനെ ആഹാരം കഴിക്കാനുള്ള വരുമാനമുണ്ടോയെന്നായിരുന്നു മന്ത്രിയുടെ ചോദ്യം.
Also Read: കൊല്ലത്ത് ബൈക്ക് യാത്രികനെ പോലീസ് എറിഞ്ഞുവീഴ്ത്തി; യുവാവിന് ഗുരുതര പരിക്ക്
കടംവാങ്ങിയും മറ്റുമാണ് ശരീരം സംരക്ഷിക്കുന്നതെന്ന് പറഞ്ഞതോടെയാണ് ജോലി ലഭിക്കുന്നതിനു പരിഗണന നൽകാമെന്ന് കടകംപള്ളി സുരേന്ദ്രൻ വ്യക്തമാക്കിയത്. മന്ത്രിയും കാഴ്ചക്കാരും ആവശ്യപ്പെട്ടതിനെത്തുടർന്ന് സദസ്സിന് മുന്നിൽ താരം തന്റെ ശരീര പ്രദർശനം നടത്തുകയും ചെയ്തു.
90 കിലോ മത്സര വിഭാഗത്തിലാണു കൊച്ചി സ്വദേശിയായ ചിത്തരേഷ് നടേഷ് ലോക ചാംപ്യനായത്. ശരീരസൗന്ദര്യ സംരക്ഷണത്തിനായി ദിവസവും 5 മണിക്കൂറാണ് താൻ ചെലവഴിക്കുന്നതെന്നാണ് താരം പറയുന്നത്. പകൽ ജോലിക്കു പോയാണ് ഇതിനുള്ള വരുമാനങ്ങൾ കണ്ടെത്തുന്നത്.
മിസ്റ്റര് യൂണിവേഴ്സ് പട്ടം നേടുന്ന ആദ്യമലയാളിയാണ് ചിത്തരേഷ് നടേശന്. ഇദ്ദേഹത്തിന് പുറമെ സന്തോഷ് ട്രോഫി താരങ്ങൾക്കും ഏഷ്യൻ ഗെയിംസ് താരങ്ങൾക്കും ജോലി നൽകുമെന്നും മന്ത്രി അറിയിച്ചിട്ടുണ്ട്.