വരാപ്പുഴ കസ്റ്റഡി മരണം: സിഐ ക്രിസ്‍പിൻ സാമിന് ജാമ്യം

കൊച്ചി: സിഐ ക്രിസ്പിന് വരാപ്പുഴ കസ്റ്റഡി മരണത്തിൽ ജാമ്യം. പറവൂർ മജിസ്‌ട്രേറ്റ് കോടതിയാണ് ജാമ്യം അനുവദിച്ചത്. സിഐക്ക് ശ്രീജിത്തിന്റെ കൊലപാതകത്തിൽ നേരിട്ട് പങ്കുണ്ടെന്നതിന് തെളിവില്ലെന്ന് കോടതി വ്യക്തമാക്കി.ഒരു ലക്ഷം രൂപയുടെയും ഒരാൾജാമ്യത്തിന്റെയും ഈടിലാണ് ക്രിസ്‍പിന് ജാമ്യം അനുവദിച്ചത്.

ശ്രീജിത്തിനെ കസ്റ്റഡിയിൽ മർദ്ദിച്ചതുമായി ബന്ധപ്പെട്ട ഗൂഢാലോചനയിൽ ക്രിസ്പിന് പങ്കുള്ളതായും തെളിയിക്കാൻ കഴിഞ്ഞിട്ടില്ലെന്ന് അഭിഭാഷകൻ വാദിച്ചു. കേസിൽ സിഐയെ കസ്റ്റഡിയിൽ ചോദ്യം ചെയ്യേണ്ടെന്ന് അന്വേഷണസംഘം അറിയിച്ചിരുന്നു. അന്യായമായി തടവിൽ വെക്കുക, തെറ്റായ രേഖകൾ ചുമത്തുക എന്നീ വകുപ്പുകളാണ് ക്രിസ്പിന് മേൽ ചുമത്തിയിട്ടുള്ളത്. ഇവ രണ്ടും ജാമ്യം ലഭിക്കുന്ന വകുപ്പുകളുമാണ്. എന്നാൽ സാക്ഷികളെ സ്വാധീനിക്കാൻ സാധ്യതയുള്ളതിനാൽ ജാമ്യം നൽകരുതെന്ന് പ്രോസിക്യൂഷൻ വാദിച്ചു.