കത്തിക്കരിഞ്ഞ മൃതദേഹം ജെസ്‌നയുടേതല്ലെന്ന് സൂചന

ചെന്നൈ: തമിഴ്‌നാട്ടിലെ ചെങ്കൽപ്പേട്ടിന് സമീപം കത്തിക്കരിഞ്ഞ നിലയിൽ കണ്ടെത്തിയ സ്ത്രീയുടെ മൃതദേഹം ജെസ്‌നയുടേതല്ലെന്ന് സൂചന. ജെസ്‌നക്കുള്ളത് പോലെ മൃതദേഹത്തിന്റെ പല്ലിനും ക്ലിപ്പുണ്ട്. ജെസ്‌നയുടെ അതെ ഉയരം തന്നെ മൃതദേഹത്തിനും ഉണ്ടെന്ന സൂചനയാണ് സംശയമുളവാക്കിയത്.

പത്തനംതിട്ട മുക്കൂട്ടുതറ സ്വദേശി ജെസ്‌നയെ കാണാതായിട്ട് 72 ദിവസങ്ങൾ പിന്നിട്ടു. ചെങ്കൽപ്പെട്ട് മെഡിക്കൽ കോളജിൽ സൂക്ഷിച്ചിരിക്കുന്ന മൃതദേഹത്തിന് ജെസ്‌നയെക്കാൾ പ്രായമുണ്ടെന്നാണ് ഒടുവിൽ കിട്ടുന്ന സൂചന. കഴിഞ്ഞ തിങ്കളാഴ്‌ചയാണ് പോലീസ് പെട്രോൾ സംഘം വിജനമായ സ്ഥലത്ത് ചക്കിലിട്ട കത്തിച്ച നിലയിൽ സ്ത്രീയുടെ മൃതദേഹം കണ്ടെത്തിയത്.

മൃതദേഹത്തിൽ മൂക്കുത്തി കണ്ടെത്തിയതും ജെസ്‌നയല്ലെന്ന നിഗമനത്തിലേക്ക് നയിക്കുന്നു. 90 ശതമാനത്തിലധികം കത്തിക്കരിഞ്ഞ നിലയിലായിരുന്നു മൃതദേഹം. മൃതദേഹം ജെസ്‌നയുടേതല്ലെന്ന് സഹോദരൻ ജെയ്‌സ് വ്യക്തമാക്കി. എന്നാൽ ജെസ്‌നയുടെ മൃതദേഹമല്ലെന്ന് ഉറപ്പു വരുത്താൻ ഡിഎൻഎ പരിശോധന നടത്തുമെന്നും ജെയ്‌സ് പറഞ്ഞു.