കുറിഞ്ഞി ഉദ്യാനം: മുഖ്യമന്ത്രി വീണ്ടും ഉന്നതതലയോഗം വിളിച്ചു

തിരുവനന്തപുരം: കുറിഞ്ഞി ഉദ്യാനവിഷയത്തിൽ മുഖ്യമന്ത്രി വീണ്ടും ഉന്നതതലയോഗം വിളിച്ചു. മൂന്നാറും കൊട്ടക്കമ്പൂരും സന്ദര്‍ശിച്ച മന്ത്രിസംഘത്തിലെ അംഗങ്ങള്‍ ഉള്‍പ്പെടെ പങ്കെടുക്കുന്ന യോഗത്തിൽ യഥാര്‍ഥ പട്ടയമുള്ള ഭൂമി ഉദ്യാനത്തിന്‍റെ പരിധിയിൽ നിന്ന് ഒഴിവാക്കണമെന്ന് റവന്യൂ വകുപ്പ് ശുപാര്‍ശ ചെയ്തേക്കും. ജനുവരി ആദ്യ ആഴ്ചയിലാണ് യോഗം.

ജോയ്സ് ജോ‍ര്‍ജ് എംപി ഈ മേഖലയിൽ കയ്യേറ്റം നടത്തിയിട്ടില്ലെന്ന് റവന്യൂ മന്ത്രി ഇ ചന്ദ്രശേഖരൻ നേരത്തെ അഭിപ്രായപ്പെട്ടിരുന്നു. എന്നാൽ ജോയ്സ് ജോര്‍ജിന്‍റേതുള്‍പ്പെടെയുള്ള കയ്യേറ്റ ആരോപണം നേരിടുന്ന ഭൂമികള്‍ മന്ത്രിതലസംഘം സന്ദര്‍ശിക്കാത്ത സാഹചര്യത്തിൽ യുഡിഎഫ് സംഘം ഇവിടം സന്ദര്‍ശിക്കുമെന്ന് പ്രതിപക്ഷനേതാവ് രമേശ് ചെന്നിത്തല അറിയിച്ചു. ചെന്നിത്തലയുടെ നേതൃത്വത്തിലുള്ള പത്തംഗസംഘമായിരിക്കും സ്ഥലം സന്ദര്‍ശിക്കുക.