Kannur Airport Opening: യുഡിഎഫിനെ വിമർശിച്ച് മുഖ്യമന്ത്രി

കണ്ണൂർ: യുഡിഎഫ് സർക്കാരിൻെറ കാലത്ത് കണ്ണൂർ അന്താരാഷ്ട്ര വിമാനത്താവളത്തിൻെറ പ്രവർത്തനങ്ങൾ നിശ്ചലമാക്കിയെന്ന് മുഖ്യമന്ത്രി പിണറായി വിജയൻ. 1996ൽ നായനാർ മുഖ്യമന്ത്രിയായിരുന്ന കാലത്താണ് ഇതിൻെറ പ്രാരംഭ പ്രവർത്തികൾ തുടങ്ങുന്നത്. എന്നാൽ പിന്നീട് വന്ന യുഡിഎഫ് സർക്കാർ ഇക്കാര്യത്തിൽ ഒന്നും ചെയ്തില്ലെന്ന് മുഖ്യമന്ത്രി പറഞ്ഞു.

കണ്ണൂർ അന്താരാഷ്ട്ര വിമാനത്താവളത്തിൻെറ ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദഹം. 2016ൽ വിമാനത്താവളം ഉദ്ഘാടനം ചെയ്തെന്ന പ്രതീതി ഉണ്ടാക്കാൻ യുഡിഎഫ് തിടുക്കം കാട്ടി. പദ്ധതി യാഥാർഥ്യമാക്കുന്നത് വൈകിച്ചത് യുഡിഎഫാണെന്നും അദ്ദേഹം കുറ്റപ്പെടുത്തി.

ശബരിമല എരുമേലിയിൽ വിമാനത്താവളത്തിന് അനുമതി നൽകണമെന്ന് മുഖ്യമന്ത്രി കേന്ദ്രത്തോട് അഭ്യർഥിച്ചു. തിരുവനന്തപുരം വിമാനത്താവളം ഒരു കാരണവശാലും സ്വകാര്യവൽക്കരിക്കരുതെന്നും അദ്ദേഹം പറഞ്ഞു. തിരുവനന്തപുരം, കോഴിക്കോട് വിമാനത്താവളങ്ങൾ ഏറ്റെടുത്ത് നടത്താൻ സർക്കാർ തയ്യാറാണെന്നും പിണറായി വിജയൻ കൂട്ടിച്ചേർത്തു.