ധനമന്ത്രിയ്ക്ക് കൊവിഡ്: മുഖ്യമന്ത്രിയും ആരോഗ്യമന്ത്രിയും സ്വയം നിരീക്ഷണത്തില്‍

തിരുവനന്തപുരം: ധനമന്ത്രി തോമസ് ഐസകിന് കൊവിഡ് സ്ഥിരീകരിച്ചതിനെ തുടര്‍ന്ന് മുഖ്യമന്ത്രി പിണറായി വിജയന്‍ അടക്കമുള്ളവര്‍ സ്വയം നിരീക്ഷണത്തില്‍ പോയി. പിണറായി വിജയന് പുറമെ ആരോഗ്യമന്ത്രി കെ കെ ശൈലജ, വ്യവസായ മന്ത്രി ഇ പി ജയരാജന്‍, തൊഴില്‍ മന്ത്രി ടി പി രാമകൃഷ്ണന്‍, വൈദ്യുതി മന്ത്രി എം എം മണി, എന്നിവരാണ് നിരീക്ഷണത്തിലേക്ക് പോയത്.

Also Read: കനത്ത മഴ: കടലിൽ മൂന്ന് ബോട്ടുകൾ അപകടത്തിൽപ്പെട്ടു; ഒൻപതുപേരെ കാണാതായി

കഴിഞ്ഞ ദിവസം തോമസ് ഐസക്ക് സിപിഐഎം സംസ്ഥാന സെക്രട്ടേറിയേറ്റില്‍ പങ്കെടുത്തിരുന്നു. ഇതേതുടര്‍ന്നാണ് മുഖ്യമന്ത്രി സ്വയം നിരീക്ഷണത്തില്‍ പോയത്. സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍, സിപിഐഎം പൊളിറ്റ് ബ്യൂറോ അംഗം എസ് രാമചന്ദ്രന്‍ പിള്ള എന്നിവരും യോഗത്തില്‍ പങ്കെടുത്തിരുന്നു. ഇവരും നിരീക്ഷണത്തില്‍ പോയിരിക്കുകയാണ്.

ഇത് രണ്ടാം തവണയാണ് മുഖ്യമന്തി നിരീക്ഷണത്തില്‍ പോകുന്നത്. നേരത്തെ മലപ്പുറം ജില്ലാ കളക്ടര്‍ക്ക് കൊവിഡ് സ്ഥിരീകരിച്ചതിനെ തുടര്‍ന്ന് കരിപ്പൂര്‍ വിമാനത്താവളം സന്ദര്‍ശിച്ച മുഖ്യമന്ത്രി നിരീക്ഷണത്തില്‍ പോയിരുന്നു.

തോമസ് ഐസക്കിന് കൊവിഡ്-19 സ്ഥിരീകരിച്ചതിനെ തുടര്‍ന്ന് മന്ത്രിയുടെ പേഴ്സണല്‍ സ്റ്റാഫ് അടക്കമുള്ളവര്‍ നിരീക്ഷണത്തില്‍ പ്രവേശിച്ചു. നിലവില്‍ തിരുവനന്തപുരം മെഡിക്കല്‍ കോളജില്‍ ചികിത്സയിലാണ്.

Also Read: ന്യൂനമർദം: കേരളത്തിൽ കനത്ത മഴയ്ക്ക് സാധ്യതയെന്ന് കാലാവസ്ഥാ കേന്ദ്രം

സംസ്ഥാനത്ത് ഇത് ആദ്യമായാണ് ഒരു മന്ത്രിയ്ക്ക് കൊവി‍ഡ് സ്ഥിരീകരിക്കുന്നത്. ഞായറാഴ്ച നടത്തിയ പരിശോധനയിലാണ് മന്ത്രിയ്ക്ക് കൊവിഡ് സ്ഥിരീകരിച്ചത്. കാര്യമായ ആരോഗ്യ പ്രശ്നങ്ങളില്ലെന്ന് മന്ത്രിയുടെ ഓഫീസ് അറിയിച്ചു. രോഗത്തിന്‍റെ ഉറവിടം വ്യക്തമല്ല.

ആന്റിജന്‍ പരിശോധനയിലാണ് കൊവിഡ് സ്ഥിരീകരിച്ചത്. സ്രവ പരിശോധന ഉടന്‍ നടത്തും. നിലവില്‍ മന്ത്രിയുടെ ആരോഗ്യനില തൃപ്തികരമാണ്.