അന്താരാഷ്ട്ര വനിതാദിനം നാളെ: സംസ്ഥാനതല ഉദ്ഘാടനം മുഖ്യമന്ത്രി നിർവഹിക്കും

തിരുവനന്തപുരം: അന്താരാഷ്ട്ര വനിതാദിനം സംസ്ഥാനതല ഉദ്ഘാടനവും ഐ.സി.ഡി.എസ്. പുരസ്‌കാര വിതരണവും 8ന് വൈകിട്ട് മൂന്നിന് നിശാഗന്ധിയിൽ മുഖ്യമന്ത്രി പിണറായി വിജയൻ നിർവഹിക്കും. ആരോഗ്യ മന്ത്രി കെ.കെ. ശൈലജ അധ്യക്ഷത വഹിക്കും. വി.എസ്. ശിവകുമാർ എം.എൽ.എ, മേയർ വി.കെ. പ്രശാന്ത്, ജില്ലാ പഞ്ചായത്ത് പ്രസിഡന്റ് വി.കെ. മധു തുടങ്ങിയവർ സംബന്ധിക്കും.

അന്താരാഷ്ട്ര വനിതാദിന വാരാചരണത്തിന്റെ ഭാഗമായി വനിതാ ശിശു വികസന വകുപ്പ് മാര്‍ച്ച് ഒന്നു മുതല്‍ എട്ടു വരെ വിവിധ പരിപാടികള്‍ സംഘടിപ്പിക്കുന്നുണ്ട്. സെന്‍ട്രല്‍ സ്റ്റേഡിയത്തില്‍ നടക്കുന്ന വാരാചരണത്തിന്റെ ആറാം ദിനത്തിലെ പരിപാടികള്‍ ഐഷാ പോറ്റി എം.എല്‍.എ ഉദ്ഘാടനം ചെയ്തു. വനിതാ ശിശുവികസന ഡയറക്ടര്‍ ഷീബാ ജോര്‍ജ് വനിതാദിന സന്ദേശം നല്‍കി.

സംസ്ഥാന സോഷ്യല്‍ വെല്‍ഫയര്‍ ബോര്‍ഡ് ചെയര്‍പേഴ്‌സണ്‍ സൂസന്‍ കോടി അദ്ധ്യക്ഷത വഹിച്ച ചടങ്ങില്‍ അഡീ. ഡി.ജി.പി ബി. സന്ധ്യ, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. പോലീസിന്റെ ആഭിമുഖ്യത്തില്‍ വിമന്‍ ആന്റ് ചില്‍ഡ്രന്‍ ഹോമിലെ കുട്ടികളുടെ സ്വയരക്ഷാ പരിശീലന പ്രകടനവും കലാപരിപാടികളും നടന്നു.