നിയമ നിർമ്മാണം കൊണ്ട് സുപ്രീം കോടതി വിധി മറികടക്കാനാവില്ല: മുഖ്യമന്ത്രി

തിരുവനന്തപുരം: ശബരിമലയിലെ സ്ത്രീ പ്രവേശനത്തിലെ സുപ്രീം കോടതി വിധി ഓർഡിനൻസ് കൊണ്ടോ നിയമനിർമ്മാണം കൊണ്ടോ മറികടക്കാനാവില്ലെന്ന് മുഖ്യമന്ത്രി പിണറായി വിജയൻ. സുപ്രീം കോടതി വിധിയുടെ മറവിൽ സംസ്ഥാന സർക്കാരിനെ അട്ടിമറിയ്ക്കാനുള്ള നീക്കം നടക്കുകയാണെന്ന് അദ്ദേഹം പറഞ്ഞു. തിരുവനന്തപുരത്ത് പുത്തരിക്കണ്ടത്ത് എൽഡി എഫ് പൊതുയോഗത്തിൽ സംസാരിക്കുകയായിരുന്നു മുഖ്യമന്ത്രി.

10 നും 50 നും ഇടയിലുള്ള സ്ത്രീകള്‍ക്ക് ശബരിമലയില്‍ പ്രവേശനം അനുവദിക്കാതിരുന്നാൽ അത് ഭരണഘടനാ വിരുദ്ധമാണെന്നാണ് സുപ്രീം കോടതി പറഞ്ഞത്. കോടതി ഭരണഘടനാ വിരുദ്ധമെന്ന് പറഞ്ഞ കാര്യത്തിനെതിരെ എങ്ങിനെയാണ് നിയമനിർമ്മാണം കൊണ്ട് വരികയെന്ന് അദ്ദേഹം ചോദിച്ചു.

നിയമപരമായ വഴിയിലൂടെ മാത്രമേ സർക്കാരിന് മുന്നോട്ട് പോവാനാവൂ. സ്ത്രീ പ്രവേശന വിഷയത്തിൽ സർക്കാർ പ്രത്യേകിച്ച് ഒരു നിലപാടും എടുത്തിട്ടില്ല. ആർ.എസ്.എസിൻെറ ഭാഗമായി നിൽക്കുന്നവരാണ് ശബരിമലയിൽ സ്ത്രീ പ്രവേശനം ആവശ്യപ്പെട്ട് ആദ്യമായി കോടതിയെ സമീപിച്ചതെന്നും മുഖ്യമന്ത്രി പറഞ്ഞു.

വിശ്വാസികൾക്ക് സിപിഎമ്മിനെ കുറിച്ച് കൃത്യമായ ധാരണയുണ്ട്. അവർക്കൊപ്പം തന്നെയാണ് സർക്കാർ നിൽക്കുന്നത്. ഇതിന് നിയമത്തിൻെറ വഴിയേ മാത്രമേ പോവാൻ സാധിക്കൂവെന്നും അദ്ദേഹം വ്യക്തമാക്കി. പുരുഷനെ പോലെ തന്നെ സ്ത്രീക്കും ആരാധനാ സ്വാതന്ത്ര്യമുണ്ടെന്നും പിണറായി വിജയൻ പറഞ്ഞു.