പീഡനാരോപണം മറച്ചുവെച്ചു; ആലഞ്ചേരിക്കെതിരെ പരാതി

കോട്ടയം: ജലന്ധര്‍ ബിഷപ് പീഡിപ്പിച്ചെന്ന് കാണിച്ച്‌ കന്യാസ്ത്രീയുടെ പരാതി മറച്ചുവെച്ച സംഭവത്തില്‍ മേജര്‍ ആര്‍ച്ച്‌ ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരിക്കെതിരെ ഐജിക്ക് പരാതി. ജലന്ധര്‍ ബിഷപ് പീഡിപ്പിച്ചെന്ന് കാണിച്ച്‌ കന്യാസ്ത്രീ ബിഷപ് ജോര്‍ജ് ആലഞ്ചേരിക്ക് നല്‍കിയ പരാതിയില്‍ നടപടിയെടുത്തില്ലെന്നും സംഭവം മറച്ചുവെച്ചെന്നും ആരോപിച്ച്‌ ആലഞ്ചേരിക്കെതിരേ വിശ്വാസികളുടെ സംഘടനയാണ് പരാതി നല്‍കിയത്. എറണാകുളം റേഞ്ച് ഐ.ജി വിജയ് സാക്കറെയ്ക്ക് പരാതി നല്‍കിയത്.

ജലന്ധര്‍ ബിഷപ് തന്നെ പീഡനത്തിനിരയാക്കിയെന്ന് കാണിച്ച്‌ കന്യാസ്ത്രീ കര്‍ദിനാള്‍ മാര്‍ ജോര്‍ജ് ആലഞ്ചേരിക്ക് പരാതി നല്‍കിയിരുന്നു. എന്നാല്‍, അത് സംബന്ധിച്ച്‌ തുടര്‍നടപടി സ്വീകരിക്കാനോ പരാതിയെ കുറിച്ച്‌ അന്വേഷിക്കാനോ തയ്യാറായില്ലെന്നാണ് വിശ്വാസികള്‍ ആരോപിക്കുന്നത്. ലൈംഗികമായി പീഡിപ്പിച്ചെന്ന് കാണിച്ച്‌ നല്‍കിയ പരാതി മറച്ചുവെച്ചെന്നാണ് പ്രധാന ആക്ഷേപം. ഇതിന് പുറമെ, പരാതിക്കാരിയെ ഭീഷണിപെടുത്തുകയും പരാതി പിന്‍വലിക്കാന്‍ സമ്മര്‍ദം ചെലുത്തുകയും ചെയ്തു. എറണാകുളം സ്വദേശി ജോണ്‍ ജേക്കബിന്‍റെ നേതൃത്വത്തിലുള്ള സംഘമാണ് കര്‍ദിനാളിനെതിരെ പോലീസിനെ സമീപിച്ചിരിക്കുന്നത്.

എന്നാല്‍, കന്യാസ്ത്രീ കര്‍ദിനാളിന് പരാതി നല്‍കിയിരുന്നോ എന്ന കാര്യത്തില്‍ ഇതുവരെ സ്ഥിരീകരണമായിട്ടില്ല. അത് കര്‍ദിനാള്‍ മാര്‍ ജോര്‍ജ് ആലഞ്ചേരിയാണ് പ്രതികരിക്കേണ്ടത്. അദ്ദേഹം വത്തിക്കാനിലായതിനാല്‍ തന്നെ ഇത് സംബന്ധിച്ച അദ്ദേഹത്തിന്റെ പ്രതികരണം പുറത്തുവന്നിട്ടില്ല.